Oʻzbek olimlari tuproq namligini saqlaydigan va unumdorligini oshiradigan bakteriyalarni aniqladi

Oʻzbekistonlik olimlar tomonidan olib borilgan ilmiy tadqiqotlar natijasida giyoh unmaydigan, suv yurmaydigan adir tuproqlaridan qator bakteriya shtammlari ajratib olindi. Mazkur mikroorganizmlar tuproqda suvni ushlab qolish va uning unumdorligini oshirishda muhim ahamiyatga ega.

Maʼlum qilinishicha, Chust adirlari tuproqlaridan topilgan bakteriyalar suvni oʻziga biriktirib, maʼlum muddat saqlab tura oladigan biologik polimerlar hosil qiladi. Bu biopolimerlar tuproq namligini barqaror saqlash, shoʻrlanishni kamaytirish va yerning unumdorligini oshirishga yordam beradi.

Olimlarning taʼkidlashicha, iqlim oʻzgarishi fonida yildan-yilga qurgʻoqlashib borayotgan hududlarda bunday biotexnologik usullar keyingi yillarda tobora dolzarb ahamiyat kasb etadi. Mavjud resurslardan unumli foydalanish va tuproqni tiklashda ana shunday bakteriyalar muhim oʻrin tutishi mumkinligi qayd etildi.

Tadqiqotchilar fikriga koʻra, mazkur shtammlar qishloq xoʻjaligi uchun yangicha imkoniyat yaratib, suv tanqisligi kuzatiladigan hududlarda yer sifatini saqlab qolishga xizmat qilishi mumkin.