Pokiston shifoxonasida yuzaga kelgan yong'in oqibatida 14 nafar chaqaloq halok bo'ldi

Yong'in 26 avgust kuni Pokiston Tibbiyot fanlari instituti (PIMS) kasalxonasining ona va bola salomatligi bo'limida yuz bergan. Dastlabki ma'lumotlarga ko'ra, yong'in konditsioner qurilmasidagi nosozlik sababli boshlangan va kislorod naylari orqali tezda alangalangan.

Voqea sodir bo'lgan paytda bo'limda 15 nafar chaqaloq bo'lgan, ulardan faqat bittasi qutqarilgan.

Yong'in sabablarini aniqlash bo'yicha tekshiruv boshlangan. Tuzilgan komissiyaga 24 soat ichida hisobot tayyorlash topshirilgan.

Senator: tibbiyot markazlarida xavfsizlikni yaxshilash "shoshilinch zarurat"

Pakistan Associated Press (APP) ma'lumotiga ko'ra, Pokiston senatorlari PIMS tug'ruqxonasidagi yong'indan so'ng kasalxonalarda xavfsizlik choralarini kuchaytirishni talab qilmoqda.

Senat raisi o'rinbosari Sayidal Xon Nosir tibbiyot markazlarida xavfsizlik tizimlarini modernizatsiya qilish "shoshilinch zarurat" ekanini ta'kidladi. U shuningdek yong'in hodisalarining oldini olish uchun xavfsizlik tizimlarini muntazam tekshirib turish va bu borada "aniq choralar ko'rish" zarurligini aytdi.

Senat raisi Said Yusuf Rizo Gilani kasalxonalarda "samarali xavfsizlik choralari, to'laqonli yong'in xavfsizligi tizimlari va barcha zarur favqulodda chora-tadbirlar" mavjud bo'lishi shart ekanini bildirdi. U xavfsizlik choralaridagi har qanday e'tiborsizlik yoki nuqsonni "yo'l qo'yib bo'lmaydigan holat" deb atab, tegishli idoralarni yong'in bo'yicha "puxta va shaffof" tekshiruv o'tkazishga chaqirdi.