Tibbiyot oliygohlarida superkontrakt bekor qilinishi mumkin

Bu haqda Sogʻliqni saqlash vazirligi tomonidan jamoatchilik muhokamasiga qoʻyilgan qaror loyihasida nazarda tutilgan.

Loyihaga koʻra, tibbiyot sohasi uchun kadrlar tayyorlovchi oliy taʼlim tashkilotlarida bakalavriat taʼlim yoʻnalishlariga oshirilgan toʻlov-kontrakt asosida qabul qilish tartibi 2026/2027-oʻquv yilidan boshlab bekor qilinadi.

Shuningdek, ushbu oʻquv yilidan boshlab tibbiyot OTMlarida “Davolash ishi” va “Pediatriya ishi” bakalavr taʼlim yoʻnalishlari negizida 5+1 shaklidagi “Umumiy tibbiyot” boʻyicha 6 yillik taʼlim yoʻnalishi joriy etiladi. Mazkur yoʻnalish bitiruvchilari oilaviy shifokor mutaxassisligiga ega boʻladi.

2027 yil 1 yanvardan boshlab bakalavriat, rezidentura (klinik ordinatura) va magistratura mutaxassisliklari boʻyicha umumiy oʻqish davrining kamida 50 foizini davlat granti asosida tamomlagan hamda maxsus imtihondan muvaffaqiyatli oʻtgan talabalar uchun davlat tibbiyot muassasalarida majburiy ishlab berish tartibi joriy etiladi.

Majburiy ishlab berish muddatlari quyidagicha belgilanmoqda:

Qoraqalpogʻiston Respublikasi va viloyatlardagi birlamchi tibbiy-sanitariya yordami muassasalarida — kamida 1 500 ish soati;

Tuman (shahar) darajasidagi (Toshkent shahri bundan mustasno) boshqa davolash-profilaktika muassasalari hamda tibbiyot sohasidagi davlat boshqaruv organlarida — kamida 2 000 ish soati;

Qoraqalpogʻiston Respublikasi va viloyatlar darajasidagi davolash-profilaktika muassasalari hamda tibbiyot sohasidagi davlat boshqaruv organlarida — kamida 2 500 ish soati;

Toshkent shahri va respublika darajasidagi davolash-profilaktika muassasalari hamda tibbiyot sohasidagi davlat boshqaruv organlarida — kamida 3 000 ish soati.

Shu bilan birga, bakalavriat, rezidentura va magistratura mutaxassisliklarida har bir oʻquv moduli boʻyicha akademik koʻrsatkichlarni oʻzlashtirishda, shuningdek davlat imtihonlarida minimal oʻtish ballari belgilanadi. Jumladan, shifokor mutaxassisliklari uchun — 70 foiz, oʻrta tibbiy xodim mutaxassisliklari uchun esa 60 foiz etib belgilanishi koʻzda tutilmoqda.