Toshkentda yangi tibbiyot klasteriga 150 million dollar sarflanadi

Loyihaning muhim qismi — kattalar uchun koʻp tarmoqli zamonaviy tibbiyot markazi qurilishi boʻyicha shartnoma Sogʻliqni saqlash vazirligi va “Kyeryong” konsorsiumi oʻrtasida imzolandi hamda qurilish ishlariga rasman start berildi.

Loyihaning umumiy qiymati 149,8 million AQSh dollari boʻlib, shundan 124 million dollari Koreya Eksimbanki orqali EDCF kredit mablagʻlari, 25,8 million dollari esa Oʻzbekistonning ulushi hisoblanadi.

Quvvati 300 oʻrinli boʻlgan IV darajali tibbiyot markazi jahon standartlariga mos holda quriladi. U ishga tushgach, 700 dan ortiq ish oʻrni yaratiladi.

Shuningdek, 130 nafar oʻzbekistonlik shifokor Koreyada malaka oshiradi, 32 nafar yuqori malakali koreyalik mutaxassis mamlakatimizda faoliyat boshlaydi. Markazda yiliga 8,5 minggacha yurak-qon tomir, transplantologiya, neyroxirurgiya va reabilitatsiya bilan bogʻliq yuqori texnologik jarrohlik amaliyotlari oʻtkazilishi rejalashtirilgan.

Eslatib oʻtamiz, 2020 yilda ham Koreya Respublikasi bilan hamkorlikda Bolalar milliy tibbiyot markazi barpo etilgan edi.