Ikkinchi sinf oʻquvchilaridan soliqlarni oʻz vaqtida toʻlash talab etildi

Videoda soliq inspeksiya xodimlari 2-sinf oʻquvchilarini yangi oʻquv yili bilan tabriklagan hamda bolalarga ota-onalari soliqlarini vaqtida toʻlashi kerakligini uqtirgan. Shuningdek, tasvirda ularga eslatma xati tarqatgani ham aks etgan.

“Avvalambor, hammangizni bayram bilan tabriklaymiz. Yangi oʻquv yilida oʻqishlaringizga omad. Biz Nishon tumani Soliq inspeksiyasidan kelyapmiz. Sizlardan bitta iltimosimiz bor. Hozir sizlarga eslatma oʻqib beramiz. Buni ota-onangizga berasizlar va ular oʻzingiz yashab turgan hududdagi soliq inspeksiyasiga borib yoki telefondan soliq ilovasi orqali qarzlarini hisoblatib toʻlov qilishlari kerak. Bir yilda soliqqa ikki marta toʻlov qilinadigan boʻlsa, birinchi toʻlov 15 apreldan 15 oktabrga qadar toʻlanishi kerak. Iloji boricha shu oydan soliqlarni toʻlab ketish talab etiladi, tushundilaringmi?”, deydi xodim.

Shuningdek, ular oʻquvchilarga Konstitutsiyadan soliqqa doir moddani oʻqib eshittirib, soliqlarga vaqtida toʻlov qilish kerakligini ham uqtirgan.

“Qoʻlingizda turgan qogʻozda Oʻzbekiston Respublikasi Konstitutsiyasining 63-moddasi yozilgan. Unda Oʻzbekiston fuqarolari vaqtida soliqlarni toʻlashi kerakligi shart deb aytilgan, Tushundilaringmi?”, deya “dars”ni davom etgan.

Yuqorida qayd etilgan holat yuzasidan Bolalar ombudsmani munosabat bildirdi. 

“Maktab oʻquv jarayoni ishtirokchisi boʻlmagan begona shaxslarni taʼlimga oid tartib-qoidalarini qoʻpol ravishda buzgan holda dars jarayoniga kirib borishi va uni buzishi, bolalarga qandaydir noqonuniy talablar bilan murojaat qilishi — mutlaqo yoʻl qoʻyib boʻlmaydigan holat”, deyiladi Bolalar ombudsmani izohida.

Shuningdek, ombudsmanining axborot xizmati partalida bolalar oʻz ota-onalarining soliqqa oid majburiyatlari uchun javobgar emas, hech bir holatda ularni bu jarayonga jalb qilish, ogohlantirish mumkin emas, deya taʼkidlagan.

Bundan tashqari, xabarda bunday nojoʻya harakatlarga yoʻl qoʻygan masʼullarga tegishli tarzda chora koʻrilishi shart, deya qoʻshimcha qilingan.