Afgʻoniston va Pokiston chegarasida qonli toʻqnashuvlar sodir boʻldi

Tolo News maʼlumotiga koʻra, janglar Dyurand chizigʻi yaqinidagi bir nechta hududlarda kechgan. Afgʻon kuchlari Pokiston bazalariga zarbalar bergan — bu esa Pokiston tomonidan amalga oshirilgan havo amaliyotiga javob sifatida baholanmoqda. Toʻqnashuvlar natijasida kamida 12 nafar pokistonlik harbiy halok boʻlgan.

Mahalliy aholi maʼlumotlariga koʻra, janglar sababli Dand-i-Patan tumanida fuqarolar uylarini tark etishga majbur boʻlgan.

Islomoboddagi Dawn gazetasining yozishicha, Pokiston armiyasi afgʻon kuchlariga qarshi artilleriya, tank va dronlar bilan javob bergan hamda Afgʻoniston hududidagi bir qator “jangchi pozitsiyalari”ni yoʻq qilgan. Davlat telekanali PTV News esa armiya Afgʻonistonga tegishli 19 ta postni egallab olganini xabar qildi.

Afgʻoniston Mudofaa vazirligi “jarayon yarim tungacha davom etib, muvaffaqiyatli yakunlanganini”, ammo mamlakat hududini himoya qilishga tayyorligini maʼlum qildi.

Rasmiy maʼlumotlarga koʻra, Afgʻoniston tomonida 20 dan ortiq kishi halok boʻlgan, shuningdek, Afgʻoniston tomoni 58 nafar pokistonlik harbiyni oʻldirganini aytmoqda.

Toʻqnashuvlardan soʻng ikki davlat bir-birini tinch aholiga oʻq uzishda aybladi. Shu bilan birga, asosiy chegara oʻtish punkti — Torxam vaqtincha yopildi.

9 oktabr kuni Afgʻoniston poytaxti Kobulda portlashlar ovozi eshitilgan, afgʻon hukumati bunda ham Pokistonni aybladi. Rasmiy Islamobod esa hozircha bu borada hech qanday rasmiy bayonot bermadi.