Isroil Gʻazoda majburiy evakuatsiyani boshladi

Bani Suhayla shahridagi Al-Raqib mahallasida taxminan 70 oila tarqatilgan varaqalar orqali zudlik bilan hududni tark etishga chaqirildi.

HAMAS rasmiylari ushbu evakuatsiyani tinch aholiga nisbatan bosim sifatida baholamoqda. Mahalliy manbalarga koʻra, koʻchirish choralari kamida 3 ming kishining uy-joyini tark etishiga sabab boʻlib, allaqachon ogʻir boʻlgan gumanitar vaziyatni yanada keskinlashtirgan.

Maʼlum qilinishicha, sulh shartlariga binoan jang harakatlari toʻxtatilgan, Isroil Gʻazo hududining faqat bir qismini tark etgan, HAMAS esa mahbuslarni qaytargan. Biroq tomonlar bitimning keyingi bosqichlari boʻyicha haligacha kelishuvga erisha olmayapti.

Ayni paytda Gʻazoda 2 milliondan ortiq aholi hududning uchdan bir qismida yashamoqda. Koʻplab odamlar vaqtincha qoʻnalgʻalarda yoki shikastlangan binolarda kun kechirishga majbur.

AQSh taklif etgan rejaga koʻra, HAMAS qurollarni topshirishi, Isroil esa hududni toʻliq tark etishi, xalqaro yordam orqali esa Gʻazo tiklanishi lozim. Ammo hozircha bu reja amalga oshmagan, aholi esa oziq-ovqat va boshpana tanqisligi sharoitida yashamoqda.

Mahalliy manbalar evakuatsiya qilingan oilalarning yashash sharoiti yanada yomonlashganini, ular jiddiy ijtimoiy va gumanitar qiyinchiliklarga duch kelayotganini taʼkidlamoqda.