"Oʻldi"ga chiqarilgan Netanyaxu Berlindan qaytdi

 Reuters agentligiga bergan intervyusida u “Roaring Lion” operatsiyasi uchinchi kun davom etayotganini maʼlum qildi. Uning aytishicha, operatsiya AQSh va prezident Donald Tramp bilan hamkorlikda amalga oshirilmoqda hamda Isroilga nisbatan mavjud ekzistensial tahdidlarni bartaraf etishga qaratilgan.

Netanyahu Tehronni tinch aholiga hujum qilishda ayblab, Isroil “zolimlarni nishonga olayotgani”ni taʼkidladi. U, shuningdek, Eron rejimi yadroviy qurol va ballistik raketalarga ega boʻlsa, butun dunyo jiddiy xavf ostida qolishini bildirdi.

AQSh va Isroilni qoʻllab-quvvatlovchi davlatlar safi kengayib, Saudiya Arabistoni, BAA, Germaniya va Fransiya ham ushbu pozitsiyani qoʻllamoqda.

Shu bilan birga, Eron oliy rahnamosi Ali Xomanaiyning oʻldirilishi eronliklar orasida turlicha munosabat uygʻotdi. Xorijdagi ayrim eronliklar bu holatni nishonlayotgan boʻlsa, koʻplab musulmonlar buni motam sifatida qabul qilmoqda. Turkiyada Eronni qoʻllab-quvvatlash namoyishlari oʻtkazildi.

Turkiya prezidenti Rajab Tayyib Erdogʻan mintaqadagi urush va inqirozlar zanjiriga eʼtibor qaratib, Eronga qarshi hujumlarni xalqaro huquq buzilishi deb baholadi. U Eron xalqiga hamdardlik bildirib, mojaroni diplomatik yoʻl bilan hal qilish zarurligini taʼkidladi. Erdogʻanning maʼlum qilishicha, AQSh, Qatar, Quvayt, BAA, Saudiya Arabistoni, Yevropa Komissiyasi va NATO rahbarlari bilan maslahatlashuvlar oʻtkazilgan.

Shimoliy Koreya Isroil va AQSh harakatlarini qoraladi. Rossiya prezidenti Vladimir Putin esa Xomanaiyning oʻldirilishini xalqaro huquq va insonparvarlik tamoyillariga zid, deb atadi hamda bu holat mintaqani yanada beqarorlashtirishi mumkinligini bildirdi. Moskva zarbalar yadroviy inqiroz xavfini kuchaytirishi mumkinligi haqida ogohlantirmoqda.

AQSh prezidenti Donald Tramp operatsiya Eronning yadroviy qurolga ega boʻlishining oldini olishga qaratilganini aytgan. Tehron esa bunday rejalarni rad etib, Yadro qurolini tarqatmaslik toʻgʻrisidagi shartnoma majburiyatlariga amal qilayotganini bildirmoqda.

Tahlilchilar fikricha, mavjud vaziyat mintaqaviy va global kuchlar oʻrtasidagi keskinlikni yanada kuchaytirishi mumkin.