"Ўлди"га чиқарилган Нетаняху Берлиндан қайтди

 Reuters агентлигига берган интервьюсида у “Roaring Lion” операцияси учинчи кун давом этаётганини маълум қилди. Унинг айтишича, операция АҚШ ва президент Доналд Трамп билан ҳамкорликда амалга оширилмоқда ҳамда Исроилга нисбатан мавжуд экзистенциал таҳдидларни бартараф этишга қаратилган.

Нетаньяҳу Теҳронни тинч аҳолига ҳужум қилишда айблаб, Исроил “золимларни нишонга олаётгани”ни таъкидлади. У, шунингдек, Эрон режими ядровий қурол ва баллистик ракеталарга эга бўлса, бутун дунё жиддий хавф остида қолишини билдирди.

АҚШ ва Исроилни қўллаб-қувватловчи давлатлар сафи кенгайиб, Саудия Арабистони, БАА, Германия ва Франция ҳам ушбу позицияни қўлламоқда.

Шу билан бирга, Эрон олий раҳнамоси Али Хоманаийнинг ўлдирилиши эронликлар орасида турлича муносабат уйғотди. Хориждаги айрим эронликлар бу ҳолатни нишонлаётган бўлса, кўплаб мусулмонлар буни мотам сифатида қабул қилмоқда. Туркияда Эронни қўллаб-қувватлаш намойишлари ўтказилди.

Туркия президенти Ражаб Таййиб Эрдоған минтақадаги уруш ва инқирозлар занжирига эътибор қаратиб, Эронга қарши ҳужумларни халқаро ҳуқуқ бузилиши деб баҳолади. У Эрон халқига ҳамдардлик билдириб, можарони дипломатик йўл билан ҳал қилиш зарурлигини таъкидлади. Эрдоғаннинг маълум қилишича, АҚШ, Қатар, Қувайт, БАА, Саудия Арабистони, Европа Комиссияси ва НАТО раҳбарлари билан маслаҳатлашувлар ўтказилган.

Шимолий Корея Исроил ва АҚШ ҳаракатларини қоралади. Россия президенти Владимир Путин эса Хоманаийнинг ўлдирилишини халқаро ҳуқуқ ва инсонпарварлик тамойилларига зид, деб атади ҳамда бу ҳолат минтақани янада беқарорлаштириши мумкинлигини билдирди. Москва зарбалар ядровий инқироз хавфини кучайтириши мумкинлиги ҳақида огоҳлантирмоқда.

АҚШ президенти Доналд Трамп операция Эроннинг ядровий қуролга эга бўлишининг олдини олишга қаратилганини айтган. Теҳрон эса бундай режаларни рад этиб, Ядро қуролини тарқатмаслик тўғрисидаги шартнома мажбуриятларига амал қилаётганини билдирмоқда.

Таҳлилчилар фикрича, мавжуд вазият минтақавий ва глобал кучлар ўртасидаги кескинликни янада кучайтириши мумкин.