Rossiya Ukrainaga zarbalari oqibatida to‘rt kishi halok bo‘ldi

2022-yil fevral oyida Rossiyaning keng ko‘lamli bosqini natijasida boshlangan urushning 4,5 yildan ortiq vaqti o‘tib, frontdagi janglar deyarli to‘xtab qolgan. 

Moskva havo hujumlarini kuchaytirib, korxonalar va portlardan tortib logistika markazlarigacha bo‘lgan iqtisodiy nishonlarga zarba bermoqda.

Har ikki tomon ham mojaroda tinch aholini nishonga olganini rad etgan.

Ukraina rasmiylarining 22-sentyabr kuni ma’lum qilishicha, Moskva bir vaqtning o‘zida Dnepropetrovsk viloyatining janubi-sharqidagi Dnepr, Krivoy Rog va Pavlograd shaharlaridagi sanoat korxonalariga zarba bergan. 

Viloyatda mashinasozlik, po‘lat ishlab chiqarish va boshqa yirik sanoat tarmoqlari joylashgan.

Rossiya to‘rtta tumanga raketa, dron va artilleriyadan hujum uyushtirdi, oqibatda Dneprda to‘rt kishi halok bo‘ldi va olti kishi yaralandi.

Ukraina harbiy-havo kuchlari ma’lumotlariga ko‘ra, Rossiya hujumida noma’lum miqdordagi "Oniks" kemaga qarshi va ballistik raketalari, shuningdek, to‘rtta qanotli raketa va 212 ta dron qo‘llanilgan.

Rossiyaning energetika obyektiga uyushtirgan hujumi shimoliy Chernigov viloyatidagi 100 mingga yaqin iste’molchining elektr ta’minotini uzib qo‘ygan.

Ukraina zarbalari

O‘z navbatida Ukraina ham Rossiyaga hujumlarni kuchaytirib, eng yirik onlayn chakana savdo tarmoqlari va neftni qayta ishlash zavodlarini nishonga olmoqda.

Ukraina dronlari Rossiyaning Volga daryosi bo‘yidagi Samara viloyatida fuqarolik obyektlariga zarba bergan, oqibatda bir kishi halok bo‘lib, to‘rt kishi yaralangan.

Rossiya Mudofaa vazirligi havo hujumiga qarshi mudofaa bo‘linmalari tunda Rossiyaning turli hududlari ustida 297 ta dronni yo‘q qilganini ma’lum qildi.