Ispaniya hukumati taxminan 500 ming nafar hujjatsiz muhojirga huquqiy maqom olish uchun ariza topshirish imkonini beruvchi amnistiya dasturini tasdiqladi.
Bosh vazir Pedro Sanches ma’muriyati tomonidan seshanba kuni qabul qilingan ushbu chora 16-apreldan boshlab ariza topshirish jarayoniga yo‘l ochadi.
Bu farmon, immigratsiyaga qarshi kayfiyatlar kuchayib borayotgan Yevropa va dunyoning boshqa ko‘plab mamlakatlari orasida Ispaniyani ajratib turadi.
Unga ko‘ra, ma’lum shartlarga javob beradigan shaxslar bir yillik yashash va ishlash uchun ruxsatnoma so‘rashlari mumkin bo‘ladi.
Migratsiya vaziri Elma Saizning aytishicha, migrantlar payshanba kunidan onlayn, 20-apreldan boshlab esa shaxsan murojaat qila oladilar. Arizalarni qabul qilish 30-iyunda yakunlanadi.
Ariza topshiruvchilar Ispaniyaga 1-yanvargacha kelgan bo‘lishlari kerak. Shuningdek, mamlakatda kamida besh oy davomida yashaganini hamda sudlanmaganligini isbotlashlari lozim.
Bir yildan so‘ng ushbu vaqtinchalik chora qo‘llanilgan shaxslar boshqa turdagi ishlash yoki yashash ruxsatnomalariga ariza topshirish huquqini qo‘lga kiritadilar.
Ispaniyaning keksayib borayotgan jamiyati oldida turgan muammolarni bartaraf etishda immigratsiyadan foydalanishga intilayotgan Sanches bu qadamni “adolat va zaruriyat harakati” deya baholadi.
Hukumat hisob-kitoblariga ko‘ra, Ispaniyada erkin yashay olmayotgan 500 000 odam bu huquqni qo‘lga kiritishi mumkin. Tahlilchilar esa bu raqam ancha yuqori bo‘lishi ehtimolini aytishmoqda.
Seshanba kuni immigratsiya xodimlarining manfaatlarini himoya qiluvchi kasaba uyushmasi hukumat ushbu vazifaga tayyor emasligini ta’kidlab, ko‘proq resurslar ajratishni talab qildi.
Taraqqiyotning sekinlashishi
Sanches bu qadamni “zarurat” deb hisoblab, “agar yangi odamlar ishlamasa va o‘z hissasini qo‘shmasa... rivojlanish sekinlashadi”, deya ogohlantirdi.
“Aynan migrantlarning ishchanligi tufayli Ispaniya iqtisodiyoti hozirda Yevropada eng tez o‘sayotgan iqtisodiyotdir”, — deya ta’kidladi Sanches
So‘nggi yillarda Ispaniya aholisi keskin o‘sib, qariyb 50 million kishiga yetdi va uning 10 millionga yaqini, ya’ni har besh kishidan biri mamlakat tashqarisida tug‘ilgan.
Ularning aksariyati qashshoqlik, zo‘ravonlik yoki siyosiy beqarorlikdan qochib kelgan kolumbiyaliklar, venesuelaliklar va marokashliklardir.
