Rossiya yangi safarbarlik boshlagan – Zelenskiy

Rossiyaning 28-sentyabr kungi Ukraina poytaxtiga uyushtirgan dron zarbalari oqibatida Kiyev markazidagi Fanlar akademiyasi zarar ko‘rib, kamida 2 kishi halok bo‘ldi.

Volodimir Zelenskiy mamlakat bo‘ylab Rossiyaning amalga oshirgan dron hujumlari natijasida umumiy to‘qqizta odam o‘lgani, 80 dan ortiq kishi jarohatlanganini bildirdi.

So‘nggi haftalarda Rossiya Kiyev va boshqa shaharlarga tezroq uchadigan, baland parvoz qiluvchi reaktiv dvigatelli dronlar bilan hujum qila boshladi.

Zelenskiy kechki videomurojaatida mazkur dronlarga qarshi kurashish hamon qiyinchiliklar tug‘dirayotganini aytdi. Uning so‘zlariga ko‘ra, Ukrainaga uchirilgan 120 ta dronning 90 tasi parrakli emas, balki reaktiv dvigatel bilan jihozlanib, ularning 57 foizi urib tushirilgan.

Rasmiylar Kiyevdagi turli nishonlarga, jumladan, farmatsevtika kompaniyasi, yoqilg‘i quyish shoxobchalari va tibbiyot muassasasiga ham hujumlar uyushtirilganini ma’lum qildi. Boshqa shahar va hududlarda esa fuqarolik obyektlari, korxonalar hamda aloqa infratuzilmasi nishonga olingan.

O‘z o‘rnida Ukraina ham Rossiyaning urushni moliyalashtirish imkoniyatlari va daromadlarini kamaytirish maqsadida neftni qayta ishlash zavodlari, onlayn savdo kompaniyalariga zarbalar bermoqda.

“Rossiya yangi safarbarlikni boshladi”

Zelenskiy Ukraina Bosh razvedka boshqarmasi hisobotini ham keltirib, Rossiya armiya uchun yangi safarbarlik boshlaganini ko‘rsatuvchi ma’lumotlar mavjudligini aytdi.

“Ular turli usullar bilan armiyaga jalb qilinayotgan odamlar sonini oshirmoqda. Rossiya armiyasiga qaysi davlatdan odamlarni yollayotgan bo‘lsa, o‘sha davlat hukumati bunga qarshi turishi lozim. Biz barcha tegishli hukumatlarni xabardor qilamiz”, – dedi Ukraina prezidenti.

Zelenskiyning so‘zlariga qaraganda, 2024-yilda Rossiyaga olib kelingan 8 ming nafar Shimoliy Koreya askari hanuz mamlakatda, yana 10 ming nafari esa tayyorgarlik jarayonida.

Rossiya prezidenti Vladimir Putin esa Moskva yangi safarbarlik e’lon qilayotgani haqidagi har qanday fikrni “mutlaqo bema’nilik” deb atagan.

Rossiya armiyasidagi markaziy osiyoliklar

“Ukraina – Markaziy Osiyo surishtiruvi” doirasida “I Want to Live” loyihasi Rossiya Mudofaa vazirligi bilan shartnoma imzolab, Rossiya armiyasida xizmat qilgan yoki hozirda xizmat qilayotgan markaziy osiyolik 13 mingga yaqin fuqaroni aniqlagan.

Eng katta ulush O‘zbekiston hissasiga to‘g‘ri kelib, 4 853 nafar fuqaro qayd etilgan.