Oʻzbekiston Afgʻonistonga 200 mln dollarlik investitsiya kiritmoqchi

Kecha, 2 mart kuni Surxondaryo viloyati Termiz shahrida Oʻzbekiston – Afgʻoniston qoʻshma savdo forumi oʻtkazildi. Forumda investitsiyalar, savdo va sanoat vaziri Laziz Qudratov va Afgʻoniston sanoat va savdo vaziri vazifasini bajaruvchi Nuriddin Aziz ishtirok etgan. 

Uchrashuv davomida ikki tomon Afgʻonistondagi oʻzbek sarmoyalari — 200 million dollardan ortiq qiymatga ega sabzavot va meva qayta ishlash zavodlarini qurish, Hayraton portida iqtisodiy va savdo majmuasini yaratish, shuningdek, ikki davlat savdogarlari uchun uzoq muddatli biznes vizalarini osonlashtirish kabi mavzularni muhokama qilingan. 

Xabarda aytilishicha, Oʻzbekistonning Savdo-sanoat palatasi oʻzini Afgʻonistonning asosiy iqtisodiy hamkorlaridan biri deb bilishini va bundan keyin ikki davlat oʻrtasidagi savdo-iqtisodiy aloqalar mustahkamlanib borishi muhimligini maʼlum qilgan.

"Oziq-ovqat mahsulotlarini ishlab chiqarish va qayta ishlash, parrandachilik, farmatsevtika sanoati, sement va qurilish materiallarini ishlab chiqarish, bogʻdorchilik, meva va sabzavotlarni qayta ishlash kabi sohalarda dastlabki 200 million dollardan ortiq sarmoya kiritish masalalari Balx, Samangan va Qunduz viloyatlarida muhokama qilindi" deydi Afgʻoniston Sanoat va savdo vazirligi vakili Axundzoda Abdul Salam Javad. 

Afgʻoniston Savdo va investitsiyalar palatasi aʼzosi Xanjon Alokozayning aytishicha, Afgʻoniston transport vositalarining harakatlanishi uchun ikki tomon oʻrtasida transport, logistika va tranzit xarajatlari kamaytirilishi kerak. Afgʻonistonga bunday sharoitlar yaratib berilganidan soʻng, ular Xitoy, Rossiya va Qozogʻiston orqali tranzit yoʻnalishlarini kengaytirishi mumkin. 

Maʼlumot uchun, joriy yilning 22 fevral kuni Afgʻoniston iqtisodiy masalalar boʻyicha bosh vazir oʻrinbosari Mulla Abdul Gʻani Barodar boshchiligidagi delegatsiya Oʻzbekistonga tashrif buyurgan edi. 3 mart kuni Oʻzbekiston – Afgʻoniston vakillarining uchrashuvi ham ham Afgʻoniston delegatsiyasining Oʻzbekistonga tashrifi yakunlari boʻyicha boʻlib oʻtgan.