"Tolibon" ayollarga yangi taqiqni oʻrnatdi. Nimalar maʼlum?

Qayd etilishicha, "Tolibon" hukumati "Fazilatni tarqatish va gunohlarni oldini olish" nomli qonun loyihasini ishlab chiqqan. Ushbu qonun kirish, 4 ta bob va 35 ta moddadan iborat boʻlib, hukumat yetakchisi Xaybatulla Oxundzoda tomonidan tasdiqlangan. Qonunga barcha jamoat joylarida amal qilish hamda butun Afgʻonistonda yashovchi fuqarolar boʻysunishi talab qilingan. 

Hukumatga koʻra, bozorga chiqib doʻkondan narsa xarid qiluvchi ayol erkaklarni ovozi bilan oʻziga jalb qilib, savdolashayotgan paytida ularning hirsini uygʻotadi. Shu sababli "Tolibon" hukumati ayollar bozorda gaplashmasligi yoki narxni muzokara qilmasligi kerakligini bildirgan. 

Ayrim manbalarga koʻra, yuqorida keltirilgan qonunga boʻysunmaganlar jazolanilmoqda. Hatto savdo rastalarida ayollarga kuch ishlatilayotgani haqida maʼlumotlar tarqalgan. Bundan tashqari, hukumat vakillari Gʻazna viloyatiga safari vaqtida jurnalistlarning voqeani suratga olishlariga ruxsat bermagan. 

Afgʻoniston fuqarolari "Fazilatni tarqatish va gunohlarni oldini olish" qonunining joriy etilishi boʻyicha jiddiy tashvishda ekanligini bildirmoqda. Ularga koʻra, bu qonun repressiya, qasos olish, zulm va keng koʻlamdagi suiisteʼmol muhitini yaratadi. Bundan tashqari, hukumat ushbu qonunni ishlab chiqib, tanqidchilarini kamsitish, haqorat qilish va hibsga olish uchun bahona sifatida ishlatmoqda, deya fikr bildirgan fuqarolar. 

Bagʻlan viloyatidan olingan maʼlumotlarga koʻra, viloyat markazidagi masjidda hukumat politsiyasi ayollar va qizlarning bozorda boʻlishini taqiqlab, uydan chiqmaslikka chaqirgan. 

"Ayollar erkak qarindoshlari bilan bozorda boʻlishlariga ruxsat berilgan, ammo ular narxni muzokara qila olmaydi. Ayollar butun tanalarini, yuzlarini yopib, doʻkondor bilan gaplashmasdan pulni berib, mahsulotni olishlari kerak", deyiladi xabarda.

Bundan tashqari, "Fazilatni tarqatish va gunohlarni oldini olish" qonunining eʼlon qilinishi bilan "Tolibon" fuqarolarga, ayniqsa, ayollarga qarshi yanada qatʼiy cheklovlar qoʻymoqda. Qonunga qarshi boʻlgan koʻplab erkaklar hamda ayollar shanba namozlari va masjid vaʼzlarida imomlar tomonidan haqorat qilayotgani, ularning ijtimoiy holatini kamsitayotganini bildirgan. 

Hukumat esa ushbu qonuni ishlab chiqishidan maqsad ayollarning jamiyatda ijtimoiy korrupsiyani shakllantirishiga yoʻl qoʻymaslik uchun deb izohlamoqda.