Davlat bayrogʻidan foydalanish tartibi oʻzgarmoqda

Oʻzbekiston Respublikasi Adliya vazirligi tomonidan ishlab chiqilgan yangi qonun loyihasi Davlat bayrogʻidan foydalanish madaniyatini huquqiy jihatdan tartibga solish, unga nisbatan hurmat va ehtiromni yanada mustahkamlashni koʻzda tutadi.

17 fevral kuni Adliya vazirligi “Oʻzbekiston Respublikasining Davlat bayrogʻi toʻgʻrisida"gi qonunga oʻzgartirish va qoʻshimchalar kiritish haqidagi loyihani jamoatchilik muhokamasiga chiqardi. Hujjatda bayroqni vertikal holda joylashtirish, uni rasmiy tadbirlarda qoʻllash hamda dafn marosimlarida foydalanishning aniq qoidalari belgilangan.

Vertikal joylashtirish: yangi standart va talablar

Endilikda Davlat bayrogʻini dastasiz, vertikal shaklda devorlarga yoki maxsus konstruksiyalarga oʻrnatish tartibi rasmiylashtirilmoqda. Bunda bayroqdagi ramzlar joylashishiga eʼtibor qaratilgan: bayroq vertikal osilganda, yarim oy va yulduzlar tasviri yuqori oʻng burchakda — kuzatuvchining oʻng tomonida boʻlishi shart. Bayroq matosining pastki qismi esa yer sathidan kamida 30 santimetr balandlikda turishi lozim.

Koʻchalar va maydonlarda bayroqni joylashtirishda transport harakati yoʻnalishi ham inobatga olinadi: oʻng tomonlama harakatlanishdan kelib chiqib, yoʻlovchilar va haydovchilar uchun bayroq ramzlari yuqori oʻng burchakda koʻrinishi, orqa tomondan qaralganda esa chap tomonda boʻlishi belgilangan. Jamoat joylariga kirish qismlarida ham bayroq shu tarzda — kirib kelayotgan shaxsga nisbatan oʻng burchakda oy-yulduzlari bilan koʻrinarli boʻlishi talab etiladi.

Dafn marosimlarida hurmat

Loyihaning yana bir muhim yangiligi — Davlat bayrogʻini tobut ustiga yopish tartibi. Bu marosim davlat va jamiyat taraqqiyotiga hissa qoʻshgan shaxslar, xizmat burchini bajarishda halok boʻlgan harbiy xizmatchilar va huquqni muhofaza qiluvchi organ xodimlari uchun koʻzda tutilgan.

Bayroqning oy va yulduzli qismi marhumning bosh qismi va chap yelkasi ustida boʻlishi, mato chetlari esa yerga tegmasdan tobutni toʻliq yopib turishi shart. Bayroq ustiga hech qanday buyum qoʻyish taqiqlanadi. Jasad qabrga qoʻyilishidan oldin bayroq ehtirom bilan yigʻib olinadi va maqbul joyda saqlanadi.

Rasmiy xonalar va ommaviy tadbirlar

Hujjatda mahalliy hokimiyat organlari majlis zallarida va diplomatik vakolatxonalarda bayroqni joylashtirish tartibi ham aniqlashtirilgan. Bayroq raislik qiluvchining orqa yoki oʻng tomonida, ishtirokchilar uchun esa markaziy va toʻsiqsiz koʻrinadigan joyda boʻlishi lozim.

Agar zalda bir nechta bayroq boʻlsa, Oʻzbekiston bayrogʻi har doim oʻng tomonda yoki kompozitsiya markazida — eng ustuvor oʻrinda boʻlishi shart. Ommaviy tadbirlarda, xususan saf tortib yurishlarda, Davlat bayrogʻi safning old qatorida yoki oʻng qanotida olib yuriladi; uni boshqa bayroqlardan keyin olib yurish qatʼiyan taqiqlanadi.

Milliy ramzga nisbatan taqiqlar

Loyiha bayroqka nisbatan har qanday hurmatsizlikka chek qoʻyishni maqsad qiladi. Jumladan, bayroqni teskari osish, uning estetik koʻrinishini buzish, ustiga turli predmet qoʻyish yoki ramziy mazmunini kamsituvchi harakatlar taqiqlanadi.

Eslatib oʻtamiz, qonun loyihasining jamoatchilik muhokamasi 2026 yil 4 martga qadar davom etadi. Har bir fuqaro milliy gʻururimiz timsoli boʻlgan bayroqdan foydalanish qoidalarini takomillashtirishda fikr bildirishi mumkin