Noqonuniy qum-shagʻal qazib olganlardan bir guruhi qoʻlga tushdi

Ekologiya, atrof-muhitni muhofaza qilish va iqlim oʻzgarishi vaziri maslahatchisi Rasul Kusherbayevning oʻz Telegram-kanalida xabar qilishicha, Chirchiq daryosining Quyichirchiq tumani hududidan oqib oʻtuvchi qismidan bir guruh shaxslar noqonuniy ravishda qum-shagʻal qazib olish bilan shugʻullanib kelganligi maʼlum boʻldi. 

"Qishloq xoʻjaligida foydalaniladigan yer maydonining ham bir qismi yoʻq qilingan. Oʻrganishda ushbu noqonuniy harakatlar natijasida tabiatga 441 mlrd 299 mln soʻmdan ortiq zarar yetkazilganligi aniqlandi", deya qayd etgan Kusherbayev. 

Bosh prokuratura huzuridagi Departamentning aniqlashicha, Samarqand va Navoiy viloyatlarida ham noqonuniy qum-shagʻal aralashmasini qazib olish holatlari kuzatilgan. 

Samarqand tumanida joylashgan "L.P." MChJning rahbari A.B. korxonada baliqchilik faoliyatini tashkil etish uchun ajratilgan hududdan oʻzboshimchalik bilan 33,2 ming kub metr hajmdagi qum-shagʻal aralashmasini noqonuniy qazib olgan. Bu orqali davlatga 3,1 mlrd soʻm zarar yetkazilgan. 

Shu kabi, Navoiyning Karmana tumani "Yangi ariq" MFY hududida joylashgan yer maydonidan 79,3 ming kub metr hajmdagi qum-shagʻal aralashmasi noqonuniy qazib olinganligi maʼlum boʻlgan. Oqibatda davlat va jamiyat manfaatlariga 1,1 mlrd soʻm zarar yetkazilgan. 

"Mazkur holatlar yuzasidan Jinoyat kodeksining 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan oʻz vakolatlarini suiisteʼmol qilish) va 229-moddasi (oʻzboshimchalik) bilan jinoyat ishlari qoʻzgʻatilib, tergov harakatlari oʻtkazilmoqda", deyiladi departament xabarida.

Bundan tashqari, yana bir holat Samarqand viloyatining Narpay tumanida aniqlangan. Viloyatning Ekologiya, atrof-muhitni muhofaza qilish va iqlim oʻzgarishi boshqarmasi ishonch telefoniga Narpay tumani "Mushkent" mahallasi fuqarolari tomonidan murojaat kelib tushgan. 

Ushbu murojaat Kattaqoʻrgʻon va Narpay tumanlari Ekologiya boʻlimi davlat inspektorlari hamda ushbu mahalla fuqarolari ishtirokida oʻrganilgan. Oʻrganish davomida Kattaqoʻrgʻon tumani "Bogʻot" mahallasida yashovchi fuqaro shu tumanning "Nayman" mahallasi hududidan oqib oʻtuvchi Qoradaryo daryosi oʻzanidan oʻzboshimchalik bilan noqonuniy tarzda qum-shagʻal aralashmasini qazib olib, yuk mashinalariga ortib berayotganligi aniqlangan. 

"Holat yuzasidan huquqbuzarga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksining 70-moddasi prim 1-qismi bilan maʼmuriy bayonnoma rasmiylashtirildi. Unga bazaviy hisoblash miqdorining 30 baravari — 10 million 200 ming soʻm miqdorida jarima belgilandi", deyiladi Ekologya vazirligi axborot xizmati tomonidan berilgan xabarda. 

Shuningdek, Narpay tumanida oʻtkazilgan yana bir reyd davomida tumanning "Mustaqillik" mahallasida yashovchi fuqaro S.R. oʻz boshqaruvidagi ekskavator bilan shu mahalla hududidan oqib oʻtuvchi Qoradaryo daryosi oʻzanidan qum-shagʻal aralashmasini noqonuniy qazib olib, yuk tashuvchi mashinalarga yuklab berayotganligi maʼlum boʻlgan. 

Mazkur holat yuzasidan S.R.ga nisbatan Maʼmuriy javobgarlik toʻgʻrisidagi kodeksning 70-moddasi prim 1-qismiga asosan maʼmuriy bayonnoma rasmiylashtirilib, BHMning 20 barobari — 6 million 800 ming soʻm miqdorida jarima qoʻllanildi. Bu orqali tabiatga 1 million 1172 ming soʻm zarar yetkazilganligi aniqlandi. Huquqbuzar jami 7 million 972 ming soʻm toʻlaydigan boʻldi.