O‘zbekiston banklarining aktivlari hajmi 962,8 trillion so‘mga yetdi

Markaziy bankning tahliliy ma’lumotlariga ko‘ra, 2026-yilning yanvar–aprel oylarida mamlakatda faoliyat yuritayotgan 34 ta tijorat banki jami 6,94 trillion so‘m sof foyda qayd etgan. Bu haqda UzA xabar berdi.

Bu ko‘rsatkich o‘tgan yilning mos davriga nisbatan 2,64 trillion so‘mga ko‘p. Tahlillarga ko‘ra, 2024-yilning dastlabki to‘rt oyida banklarning sof foydasi 3 trillion so‘mni tashkil etgan bo‘lsa, so‘nggi ikki yil mobaynida mazkur ko‘rsatkich ikki baravardan ziyod o‘sgan.

Bank aktivlarida ham o‘sish bor

Joriy yilning 1-may holatiga ko‘ra, mamlakat banklarining jami aktivlari hajmi 962,8 trillion so‘mga yetgan. Bu bir yil avvalgi ko‘rsatkichga nisbatan qariyb 133 trillion so‘mlik o‘sish demakdir.  

Bank aktivlarining 338,5 trillion so‘mi yoki 35 foizi xorijiy valyuta hissasiga to‘g‘ri keladi. Qiyosiy tahlillar shuni ko‘rsatadiki, 2025-yil 1-may holatida xorijiy valyutadagi aktivlar hajmi 335,8 trillion so‘m bo‘lib, umumiy aktivlarning 40 foizini tashkil etgan.  

Demak, bir yil ichida valyutadagi aktivlar ulushi 5 foiz bandga qisqarib, milliy valyutadagi operatsiyalar salmog‘i ortgan.  

Banklarni aktivlar hajmi bo‘yicha tahlil qilganda, mamlakatda aktivlari 30 trillion so‘mdan yuqori bo‘lgan 12 ta bank faoliyat yuritmoqda. Shuningdek, 9 ta bankning aktivlari 10–30 trillion so‘m, 8 ta bankning aktivlari 3–10 trillion so‘m oralig‘ida bo‘lsa, 5 ta bankning aktivlari 3 trillion so‘mgacha yetadi.