Netanyaxu oʻrnini kim egallaydi?

2026-yil 26-sentabr kuni Isroil muxolifatining besh yetakchi vakili Netanyaxu hukumatini hokimiyatdan chetlatish maqsadida tajovuz qilmaslik to‘g‘risidagi bitimni imzoladi.

Ular orasida sobiq bosh vazirlar Yair Lapid va Naftali Bennett, sobiq Bosh shtab boshlig‘i Gadi Ayzenkot, Demokratlar partiyasi rahbari Yair Golan hamda Yisrael Beyteynu partiyasi yetakchisi Avigdor Liberman bor.

Ular mafkuraviy qarashlaridagi farqlarga qaramay, sionistik hukumat tuzish va mamlakatni qayta tiklashni umumiy maqsad sifatida belgilagan.

Biroq Al Jazeera tahliliga ko‘ra, muxolifat vakillarining aksariyati o‘ng qanot siyosatini qo‘llab-quvvatlaydi. Ularning hech biri Falastin davlatini tashkil etishni o‘zining aniq siyosiy maqsadi sifatida ilgari surmagan. Demokratlar partiyasi rahbari Yair Golan bu masalani uzoq muddatli maqsad sifatida ko‘rishga nisbatan ochiqroq pozitsiyada.

Netanyaxu ketsа, siyosat o‘zgaradimi?

Tahlilchilarning fikricha, Netanyaxuga qarshi siyosiy blokning shakllanishi Isroilning ichki siyosatida muhim o‘zgarish bo‘lishi mumkin. Ammo bu Falastin masalasida yoki mintaqadagi harbiy siyosatda tub burilish bo‘lishini anglatmaydi.

Muxolifat yetakchilarining aksariyati xavfsizlik, harbiy xizmat va Isroilning mintaqadagi manfaatlari masalalarida o‘ng qanot qarashlariga yaqin. Ularning asosiy farqi ko‘proq hukumatni boshqarish uslubi, Netanyaxuning siyosiy kelajagi va davlat institutlariga munosabatda namoyon bo‘ladi.

Shu sababli 27-oktabr saylovlarida Netanyaxuga muqobil hukumat shakllanishi mumkin bo‘lsa-da, bu Falastin davlatini tashkil etish yoki G‘azodagi urushga munosabatning avtomatik ravishda o‘zgarishini anglatmaydi.