Oʻzbekistonda raqamlashtirish tufayli vazirlik va idoralarida 2000 dan ortiq shtat birligi qisqartiriladi

Farmonga koʻra, vazirlik va idoralarda 2141 shtat birligi, jumladan byudjet tashkilotlaridan 1863 ta, byudjetdan tashqari jamgʻarmadan esa 278 ta lavozim shtat jadvali chiqarildi.

Unga asosan eng qisqartirishlar 498 ta oʻrin bilan Soliq qoʻmitasi, 224 ta shtat bilan Suv xoʻjaligi vazirligi, 200 ta ish oʻrni bilan Qishloq xoʻjaligi vazirligi hamda 163 ta bilan Bandlik vazirligi hisobiga toʻgʻri kelmoqda.

Shu bilan birga qoʻmitalardan 4 ta, agentliklardan 6 ta hamda inspeksiyalardan 6 ta, jami 16 ta rahbar oʻrinbosarlari shtati tugatiladi.

Bunda vazirlik, qoʻmitalar, agentliklar va inspeksiyalar hamda ularning hududiy hamda tuman (shahar) boʻlinmalarining jami boshqaruv xodimlari cheklangan soni 46 989 ta etib belgilanadi.

Kambagʻallikni qisqartirish va bandlik vazirligi kasaba uyushmalari bilan birga shtat birliklari qisqartirilgan xodimlarni ish bilan taʼminlashga koʻmaklashadi.

Avvalroq Tuman va shahar hokimliklari faoliyatini takomillashtirishga doir prezident farmoni ishlab chiqilgandi. Hujjatda ushbu tuzilmalarda hokim oʻrinbosarlari sonini 4 nafar etib belgilash taklif qilingan. Hozirda har bir hokimning 6 nafardan oʻrinbosari bor.