Shotlandiyaliklar odam miyasiga nanorobot oʻrnatmoqchi

Masalan, miya tomirlarining zaiflashishi va kengayishi natijasida yuzaga keladigan anevrizma ogʻir va alomatsiz kechuvchi xastalik hisoblanadi. Bu patologiya shifoxonaga yotqizilgunga qadar bemorlarning 50 foizini hayotdan olib ketadi. Dunyo boʻyicha mazkur kasallikdan yiliga 500 mingga yaqin odam hayotdan koʻz yumadi. 

Shotlandiyalik olimlar tomonidan yaratilgan ishlanmaning oʻlchami 295 nanometr boʻlib, boshqacha aytganda, inson qizil qon hujayralari hajmining yigirmadan bir qismiga teng. Odatda virus oʻlchami 100 nanometr, aksariyat bakteriyalarniki esa 1000 nanometrdan iborat boʻladi. 

"Shotlandiyaliklar tomonidan yaratilgan mitti robot markaziga magnit joylashtirilib, atrofi anevrizma muolajasida qoʻllaniladigan trombinlar bilan qoplangan. Qurilma arteriya boʻylab magnit maydon yordamida harakatlantiriladi. Muayyan haroratda ular qobigʻi parchalanib, preparat miyaning zararlangan qismiga kiradi", deyiladi SSV matbuot xizmati tomonidan berilgan xabarda. 

Hozircha innovatsion yangilik jonivorlarda tajribadan oʻtkazilgan va muvaffaqiyatli natijalarni taqdim etgan. Oldinda klinik sinovlar bor. Ularning xulosalari asosida nanorobotlar tibbiy amaliyotga tatbiq etilishi mumkin.