Tramp Yevropa davlatlariga 100 foizlik boj bilan tahdid qilmoqda

Donald Tramp AQSH texnologiya gigantlari uchun raqamli xizmatlar solig‘ini joriy qiladigan Yevropa davlatiga 100 foizlik import bojini qo‘llashini bildirdi. Bu haqda BBC ma'lumot berdi.

Tramp “Truth Social” platformasida yozishicha, ko‘plab Yevropa mamlakatlari bunday yig‘imni joriy etishni muhokama qilmoqda, ba’zilari esa bunga yaqin turibdi.

U jazo choralari zudlik bilan qo‘llanilishidan va mavjud har qanday ikki tomonlama savdo shartnomalari butunlay bekor qilinishidan ogohlantirdi.

Bayonot yangi yig‘imlarni tez orada joriy etishni rejalashtirayotgan davlatlarga qaratilgan. London bunday soliqni 2020-yildayoq amalga kiritganini hisobga olsak, uning Buyuk Britaniya uchun aniq oqibatlari darhol ayon bo‘lmadi.

“Ushbu bayonot shuni anglatsinki, bunday soliqni joriy qilgan har qanday davlatning Amerika Qo‘shma Shtatlariga yuboradigan barcha tovarlariga zudlik bilan 100 foizlik TARIF joriy etiladi”, — deb yozdi u.

Britaniyada allaqachon soliq bor

Buyuk Britaniyaning 2 foizlik Raqamli xizmatlar solig‘i raqamli biznesdan oladigan global daromadi 500 million funt sterlingdan, Buyuk Britaniyadagi umumiy daromadi esa 25 million funt sterlingdan oshadigan yirik qidiruv tizimlari, ijtimoiy tarmoq platformalari va onlayn bozorlarga (marketpleyslar) nisbatan qo‘llanadi.

Bu holat AQShning Apple, Google, Meta va Amazon kabi yirik kompaniyalariga ta’sir ko‘rsatadi. Buyuk Britaniya G‘aznachiligi ma’lumotlariga ko‘ra, ushbu soliq 2024–2025 yillarga kelib 800 million funt sterlingdan ortiq daromad keltirgan. Bu ko‘rsatkich 2023–2024 yillardagi 678 million funt sterlingga nisbatan sezilarli darajada yuqori.

Yevropadagi vaziyat 

Trampning shunday soliqni joriy etishni rejalashtirayotgan Yevropa davlatlariga javob choralari bilan tahdid qilishi AQSH va Yevropa Ittifoqi yangi savdo bitimini yakunlaganidan bir necha kun o‘tib yuz berdi.

Soliq siyosati bilan shug‘ullanuvchi “Tax Foundation” notijorat tashkilotining ma’lumotlariga ko‘ra, Fransiya, Italiya va Ispaniya ham o‘z hududida faoliyat yurituvchi yirik kompaniyalarga 3 foizlik raqamli xizmatlar solig‘ini joriy qilgan.

Yevropa Ittifoqining yana bir qancha davlatlari ham shunga o‘xshash soliqni amaliyotga tatbiq etgan yoki taklif bildirilgan.

Joriy yil boshida Amazon aynan shunday soliqlarni sabab qilib, sotuvchilardan olinadigan to‘lovlarni oshirgan edi.

Trampning tariflar siyosati

Tramp 2025-yilda qayta prezident bo‘lganidan buyon ko‘plab mamlakatlarga yuqori tariflar joriy etishga urinmoqda.

Fevral oyida AQSH Oliy sudi Trampning 10 foizlik global boj joriy etishga qaratilgan avvalgi urinishini bekor qildi.

Shunday bo‘lsa-da, AQSH yaqinda o‘zining deyarli butun import hajmini ta’minlaydigan o‘nlab davlatlarga ularni majburiy mehnatga qarshi yetarlicha kurashmayotganlikda ayblab, 10-12,5 foizlik yangi tariflar joriy etdi.