Mirziyoyev 9 oy davomida toʻrtinchi marta Qozogʻistonga bordi

Bugun, 17 sentabr kuni Prezident Mirziyoyev oʻtirgan samolyot Ostona shahridagi aeroportga qoʻndi. Prezident matbuot xizmatiga koʻra, davlat rahbarini qozogʻistonlik hamkasbi mamlakatda boʻlib oʻtadigan ikkinchi "Markaziy Osiyo – Germaniya" sammitida ishtirok etish uchun chaqirgan. 

Maʼlumot uchun, 15 sentabr kuni Germaniya kansleri Olaf Shols Oʻzbekistonga kelgandi va mamlakat bilan bir qator kelishuvlar tuzgandi. Shundan soʻng Olaf Shols Oʻzbekistondagi safarini yakunlab Qozogʻistonga uchib ketdi. 

Joriy yilning 8 sentabr kuni ham Prezident amaliy tashrif bilan Qozogʻiston poytaxtiga borgan. Unda davlat rahbari Ostona shahrida boʻlib oʻtgan V Butunjahon koʻchmanchilar oʻyinlarining ochilish marosimida qatnashgan edi.

Shuningdek, Mirziyoyev 7 avgust kuni ham Ostonada boʻlib, "Markaziy Osiyo + Yaponiya" formatidagi muloqotda ishtirok etgandi. 

Bundan tashqari, davlat rahbari joriy yilning 3 iyul sanasida ham Qozogʻistonga davlat tashrifi bilan borgan. Unda Mirziyoyev Shanxay hamkorlik tashkiloti davlat rahbarlari kengashining navbatdagi majlisi va "ShHT plyus" formatidagi uchrashuvda ishtirok etish uchun mamlakatda boʻlgandi.