Suriya prezidenti BMT minbaridan Turkiya va boshqa mamlakatlarga minnatdorlik bildirdi

Ash-Shara taʼkidlaganidek, u BMT Bosh Assambleyasida qariyb 58 yildan keyin nutq soʻzlagan ilk suriyalik yetakchi hisoblanadi.

Asosiy nuqtalar

Isroil tahdidlari haqida: prezidentning soʻzlariga koʻra, 8 dekabrdan beri Isroildan kelayotgan tahdidlar toʻxtamagan va bu mintaqaga yangi, xatarli toʻqnashuvlar olib kelishi mumkin. Suriya xalqaro hamjamiyatni oʻz hududiy yaxlitligini himoya qilishda qoʻllab-quvvatlashga chaqirdi.

Gʻazo xalqini qoʻllab-quvvatlash: Ash-Shara Gʻazo aholisi — bolalar, ayollar va zulmga duch kelayotgan barcha millatlarni himoya qilish kerakligini taʼkidlab, “Urush toʻxtatilishi shart” dedi.

Sanksiyalarga munosabat: prezidentning taʼkidlashicha, faol diplomatiya tufayli Suriya koʻplab xalqaro munosabatlarni tikladi va aksariyat sanksiyalar bekor qilindi. Shu bilan birga, u qolgan sanksiyalarni ham toʻliq bekor qilishga chaqirdi.

Eski rejimning jinoyatlari: Ash-Sharaning taʼkidlashicha, agʻdarilgan rejim 1 millionga yaqin odamni oʻldirgan, yuz minglab insonlarni qamoqlarda qiynoqqa solgan, 14 million odamni uyidan chiqarib yuborgan va mamlakatga xorijiy kuchlar hamda qoʻshinlarni olib kirgan. Undan tashqari, 200 dan ortiq kimyoviy hujum amalga oshirilgani qayd etildi.

Qochqinlarni qaytarish va islohotlar: prezident suriyalik qochqinlar uchun vataniga qaytish yoʻllari ochilganini bildirdi. Shuningdek, narkobiznesga qarshi kurash kuchaytirilganini va Suriya endi “muammo eksport qiluvchi” mamlakat emasligini taʼkidladi.

Ash-Shara nutqini shunday xulosa bilan yakunladi:

“Suriya va butun mintaqa uchun bu — barqarorlik, tinchlik va taraqqiyotga erishish uchun tarixiy imkoniyatdir”.