Urganch davlat universitetiga nisbatan ish qoʻzgʻatildi

Unda yozilishicha, Raqobat qoʻmitasining Xorazm viloyati hududiy boshqarmasi viloyat prokuraturasining topshirigʻiga asosan Urganch davlat universiteti tomonidan davlat xususiy sherikchiligi asosida 7 qavatli, 600 oʻrinli talabalar turar joyi binosi qurilishi boʻyicha boshlangʻich narxi 29,7 mlrd soʻm boʻlgan tender savdosi yuzasidan oʻrganish ishlarini oʻtkazgan. 

Oʻrganishlar davomida universitet tomonidan Xorazm viloyati qurilishda tanlov savdolarini tashkil etish konsalting markaziga yuborilgan anketada "7 qavatli, 600 oʻrinli talabalar turar joyi binosi qurilishi" obʼektini sohaviy mansubligi va xavf-xatar toifasi II toifa qilib belgilanganligi maʼlum boʻlgan. 

"Vazirlar Mahkamasining 2020 yil 20 avgustdagi 496-sonli qaroriga asosan, 9 qavatgacha boʻlgan oliy taʼlim muassasalari III toifa sifatida "Shaffof qurilish" milliy axborot tizimiga joylashtirilishi lozimligi qayd qilingan", deyiladi xabarda. 

Ammo Urganch davlat universiteti tomonidan III toifa sifatida "Shaffof qurilish" milliy axborot tizimiga joylashtirilishi lozim boʻlgan obʼektni II toifa qilib belgilashi natijasida boshqa viloyatdagi qurilish tashkilotlarining tenderda ishtirok etishi cheklangan.

Yuqoridagilarga asosan, hududiy boshqarma maxsus komissiyasi tomonidan Urganch davlat universitetiga nisbatan "Raqobat toʻgʻrisida"gi qonunning 29-moddasi talablari buzilishi yuzasidan belgilangan tartibda ish qoʻzgʻatilib, natijasi yuzasidan buyurtmachi tashkilot mansabdor shaxsiga nisbatan maʼmuriy javobgarlik belgilash yuzasidan tegishli sud organiga maʼlumotlar yuborilgan.