Ombudsman koʻmagida fuqaro ishga tiklandi va 21,3 mln soʻm undirildi

Murojaat Ombudsmanning Fargʻona viloyatidagi mintaqaviy vakili tomonidan nazoratga olinib, holat atroflicha oʻrganildi. Tekshiruv davomida fuqaroni ishdan boʻshatishga asos sifatida keltirilgan holatlar amaldagi qonun talablariga toʻliq muvofiq emasligi aniqlandi. 

Jumladan, murojaatchi 2017 yildan buyon uzluksiz ishlab kelayotgani va ushbu davrda uning lavozimi boʻyicha qoʻshimcha malaka talablari qoʻyilmagani inobatga olinmagan.

Shundan soʻng, Ombudsman tomonidan fuqaroni ishga tiklash, majburiy progul kunlari uchun ish haqi hamda maʼnaviy zararni undirish boʻyicha sudga daʼvo arizasi kiritishda huquqiy yordam koʻrsatildi.

Fuqarolik ishlari boʻyicha Fargʻona tumanlararo sudining hal qiluv qaroriga koʻra, fuqaro G.M. tarbiyachi lavozimiga qayta tiklandi. Shuningdek, uning foydasiga 16 mln 300 ming soʻm ish haqi hamda 5 mln soʻm maʼnaviy zarar undirish belgilandi.

Hozirgi kunda fuqaro oʻz mehnat faoliyatini davom ettirmoqda.