Pulli parkovka boʻyicha auksion qayta oʻtkazilishi kerakmi?

Partiyaning bildirishicha, tarif siyosati, ijtimoiy himoya va ochiqlikka oid talablar jamoatchilik uchun muhim hisoblanadi.

XDP quyidagi shartlarni belgiladi:

• tariflarni belgilashda aholining real daromadlari va ijtimoiy ehtiyojlari hisobga olinishi;
• yigʻilayotgan mablagʻlar qayerga sarflanishi haqida toʻliq ochiq maʼlumot taqdim etilishi;
• davlat shifoxonalari, «Inson» markazlari, kutubxonalar kabi ijtimoiy obʼektlar oldida maʼlum vaqt bepul toʻxtash imkoni yaratilishi;
• xususiy va jamoat obʼektlaridagi parkovkalarning kamida 5 foizi imtiyozli toifalar uchun bepul ajratilishi;
• «toʻxtash mumkin emas» belgisi boʻlgan joylarda pulli toʻxtash joyi tashkil etilishining toʻxtatilishi.

Shu bilan birga, ayrim kuzatuvchilar va faollar bu talablarni amalga oshirish amalda mumkin emasligini taʼkidlamoqda. Ularga koʻra, avvalambor oʻtgan yilgi pulli parkovka boʻyicha auksion natijalari bekor qilinishi va mazkur jarayon yangidan, shaffof va raqobatli tarzda oʻtkazilishi zarur.

Tanqidchilarning taʼkidlashicha, amaldagi operatorni tanlash jarayoni boʻyicha jiddiy shubhalar mavjud va korrupsiya haqidagi eʼtirozlar jamoatchilikda keskin norozilik uygʻotgan.

 Ular parkovka tizimi operatorligi avval davlatga qaytarilishi, shundan keyin ochiq auksion orqali yangi tanlov oʻtkazilishi kerakligini aytishmoqda. Yangi tanlovda ishtirokchilar Toshkent aholisining talablarini oldindan inobatga olgan holda ishtirok etishi va moliyaviy kafolatga ega boʻlishi shart ekani taʼkidlanmoqda.

Muammoga oid muhokamalar davom etmoqda.