Samarqandda kumushning noqonuniy savdosiga chek qoʻyildi

Maʼlumotlarga koʻra, Narpay tumani hududida Navoiy viloyatida yashovchi 1980, 1983 va 1987 yillarda tugʻilgan 3 nafar fuqaro “shartli xaridor”ga 18 kilogramm kumush qotishmasini har bir gramini 11 700 soʻmdan hisoblab, jami 21 ming AQSh dollariga sotish vaqtida jinoyat ustida ushlangan.

Iqtisodiyot va moliya vazirligi huzuridagi Davlat asillik darajasi nazorati inspeksiyasining xulosasiga koʻra, ashyoviy dalil sifatida olingan metallning sof ogʻirligi 16 kilogramm 744 grammni tashkil etgan boʻlib, uning asillik darajasi “999” ekani aniqlangan.

Shuningdek, tegishli baholash xulosasiga koʻra, ushbu kumushning umumiy qiymati 502 million 344 ming soʻmga tengligi belgilangan.

Hozirda mazkur shaxslarga nisbatan Jinoyat kodeksining 177-moddasi 4-qismi “a” bandi (“Qimmatbaho metalllar yoki qimmatbaho toshlarni noqonuniy ravishda aylantirish”) bilan jinoyat ishi qoʻzgʻatildi. Kumush qotishmasining kelib chiqish manbasini aniqlash boʻyicha tergovoldi harakatlari amalga oshirilmoqda.