Самарқандда кумушнинг ноқонуний савдосига чек қўйилди

Маълумотларга кўра, Нарпай тумани ҳудудида Навоий вилоятида яшовчи 1980, 1983 ва 1987 йилларда туғилган 3 нафар фуқаро “шартли харидор”га 18 килограмм кумуш қотишмасини ҳар бир грамини 11 700 сўмдан ҳисоблаб, жами 21 минг АҚШ долларига сотиш вақтида жиноят устида ушланган.

Иқтисодиёт ва молия вазирлиги ҳузуридаги Давлат асиллик даражаси назорати инспекциясининг хулосасига кўра, ашёвий далил сифатида олинган металлнинг соф оғирлиги 16 килограмм 744 граммни ташкил этган бўлиб, унинг асиллик даражаси “999” экани аниқланган.

Шунингдек, тегишли баҳолаш хулосасига кўра, ушбу кумушнинг умумий қиймати 502 миллион 344 минг сўмга тенглиги белгиланган.

Ҳозирда мазкур шахсларга нисбатан Жиноят кодексининг 177-моддаси 4-қисми “а” банди (“Қимматбаҳо металллар ёки қимматбаҳо тошларни ноқонуний равишда айлантириш”) билан жиноят иши қўзғатилди. Кумуш қотишмасининг келиб чиқиш манбасини аниқлаш бўйича терговолди ҳаракатлари амалга оширилмоқда.