Shahrixonda “jihod” gʻoyasini targʻib qilgan voyaga yetmagan shaxs faoliyati fosh etildi

Tekshiruvlarga koʻra, u Instagram va Telegram tarmoqlarida “Ahli sunna editlar” nomli guruh tuzib, “Abu Bakr” taxallusi ostida faoliyat yuritgan. Guruhga u bilan bir maktabda oʻqigan sakkiz nafar tengdoshini ham qoʻshib, ular bilan “jihod” va “shahidlik” haqidagi gʻoyalarni muhokama qilgan.

Maʼlum boʻlishicha, guruh aʼzolari xorijdagi noqonuniy qurolli tuzilmalarga qoʻshilishni ham rejalashtirgan.

Huquqni muhofaza qiluvchi idoralar tomonidan oʻtkazilgan tezkor choralar natijasida mazkur noqonuniy faoliyatga chek qoʻyildi, guruh aʼzolarining chet elga chiqib ketishining oldi olindi.

Holat yuzasidan Oʻzbekiston Respublikasi Jinoyat kodeksining 244¹-moddasi uchinchi qismi “g” bandi va 244²-moddasi ikkinchi qismi asosida jinoyat ishi qoʻzgʻatildi. Tergov harakatlari davom etmoqda.

Tergov jarayonida voyaga yetmagan shaxs oʻz qilmishidan chin dildan pushaymonligini bildirib, bu yoʻlning notoʻgʻri ekanini tan olgan.