Uchta bankning 148 nafar xodimi tartibga chaqirildi

Qayd etilishicha, yuqorida nomi keltirilgan banklarning ayrim xodimlari Oʻzbekiston qonunchiligida taqiqlagan boʻlsa ham tadbirkorlik faoliyati bilan shugʻullanib yurgan. Mazkur uch bankda ishlaydigan 148 nafar boshqaruv xodimi 155 ta tadbirkorlik subʼektida taʼsischilik asosida faoliyat yuritib kelgan. 

Jumladan, "Mikrokreditbank" ATBning 94 nafar boshqaruv xodimi 96 ta tadbirkorlik subʼektida, "Biznesni rivojlantirish banki" ATBning 41 nafar boshqaruv xodimi 46 ta tadbirkorlik subʼektida hamda "Turonbank" ATBning 13 nafar boshqaruv xodimi 13 ta tadbirkorlik subʼektida taʼsischi sifatida roʻyxatdan oʻtgan.

"Banklar tomonidan taqdimnomalar tanqidiy muhokama qilingan holda tadbirkorlik subʼektlarida taʼsischilik qilayotgan xodimlarga nisbatan ogohlantirish xatlari berilib, qayd etilgan qonunbuzilishi holatlari bartaraf etilmoqda", deyiladi xabarda.

Ammo ularga mazkur holat yuzasidan ogohlantirish xati berish bilan cheklangan xalos. Yoki agentlik taqdim etgan maʼlumotlarda bu keltirilmagan. 

Eslatib oʻtamiz, agentlik tomonidan Transport, Maktabgacha va maktab taʼlimi hamda Madaniyat vazirliklari va ularning tizim tashkilotlarida ishlovchi 107 nafar boshqaruv xodimi tadbirkorlik bilan shugʻullanib kelayotganligi aniqlangan edi. 

Maʼlumot uchun, Oʻzbekiston Respublikasining "Tadbirkorlik faoliyati erkinligining kafolatlari toʻgʻrisida"gi, "Davlat fuqarolik xizmati toʻgʻrisida"gi qonunlarida davlat fuqarolik xizmatchisi tadbirkorlik faoliyati bilan shugʻullanishi taqiqlangan.