Adidas Isroildagi reklama kampaniyasi ortidan uzr so‘radi

Germaniyaning sport kiyimlari ishlab chiqaruvchisi Adidas Isroilda o‘tkazilgan reklama kampaniyasi ortidan tanqidlar va boykot chaqiriqlariga duch keldi. Bahs kompaniyaning oyoq-qo‘lida farq bo‘lgan mijozlar uchun mo‘ljallangan Single Shoe Service xizmatini targ‘ib qilgan reklama materiallari sabab yuzaga kelgan.

Reklamada Shalev Biton ham ishtirok etgan. U 2021-yilda Isroil armiyasida xizmat qilgan vaqtida jarohat olgan va chap oyog‘idan ayrilgan. Keyinchalik u chap oyog'iga protez kiygan va yugurish sporti bilan shug'ullangan. Biton reklama videosida Adidas do‘konida bitta krossovkani kiyib ko‘rishi va keyinchalik yugurishi tasvirlangan. Video ibroniy tilida tayyorlangan.

Single Shoe Service nima?

Single Shoe Service (Yagona poyabzal xizmati) Adidas ushbu xizmatni 2026-yil boshida Yevropaning 23 davlatida ishga tushirgan. Dastur doirasida oyoq-qo‘lida farqi bo‘lgan mijozlar to‘liq juftlik o‘rniga o‘ziga kerak bo‘lgan bitta oyoq kiyimini juftlik narxining 50 foiziga sotib olishi mumkin. Kompaniya xizmat nogironligi bo‘lgan insonlarning sport va kundalik hayotda qulayroq ishtirok etishiga yordam berish maqsadida ishlab chiqilganini bildirgan.

Adidasning rasmiy ma’lumotiga ko‘ra, xizmat 2026-yil 19-yanvardan kompaniya do‘konlari faoliyat yurita boshlagan. Dastur ishlab chiqilishida nogironligi bo‘lgan insonlar hamda Paralimpiya harakati bilan bog‘liq tashkilotlar ishtirok etgan.

Nega kampaniya bahsga sabab bo‘ldi?

Bahsga sabab bo‘lgan asosiy omil — reklamada sobiq isroillik harbiyning ishtirok etishi va kampaniyaning amputatsiya bilan bog‘liq xizmatni targ‘ib qilishi bo‘ldi.

Falastinni qo‘llab-quvvatlovchi faollar reklama kampaniyasini G‘azodagi urush va u yerda jarohatlar hamda amputatsiyalar sonining ortishi fonida tanqid qildi. Ayrim guruhlar Adidas mahsulotlarini boykot qilishga chaqirdi.

Shu bilan birga, Biton reklamadagi yagona nogiron sportchi bo‘lmagan. Anadolu agentligi ma’lumotiga ko‘ra, u Isroildagi Adidas do‘konlarida namoyish etilgan kampaniyada qatnashgan 11 nafar nogiron sportchidan biri bo‘lgan.

Adidas qanday munosabat bildirdi?

Adidas kampaniyani kompaniyaning Isroildagi mahalliy jamoasi tomonidan amalga oshirilgan mahalliy tashabbus sifatida ta’rifladi. Kompaniya reklama materiallaridan biri kuchli reaksiyalar va xavotirlarga sabab bo‘lganini tan olib, yuzaga kelgan holat uchun uzr so‘radi.

Kompaniya, shuningdek, tanqidlarni jiddiy qabul qilayotganini bildirdi. Shu bilan birga, Adidasning rasmiy ma’lumotlariga ko‘ra, Single Shoe Service dasturi Isroilga xos loyiha emas, balki avval Yevropada yo‘lga qo‘yilgan kengroq inklyuziv xizmat hisoblanadi.

Bahsning ikki tomoni

Kampaniya atrofidagi munozarada ikki xil yondashuv shakllandi. Tanqidchilar reklamada sobiq harbiydan foydalanishni G‘azodagi urush va nogiron bo‘lib qolgan falastinliklar muammosi bilan bog‘lab, buni noo‘rin deb baholadi. Adidas esa xizmatning asosiy maqsadi oyoq-qo‘lida farqi bo‘lgan insonlar uchun sport poyabzalidan foydalanishni osonlashtirish ekanini ta’kidlamoqda.

Shunday qilib, mojaro Adidasning nogironligi bo‘lgan insonlar uchun ishlab chiqqan xizmatining o‘zidan ko‘ra, uni targ‘ib qilishda tanlangan reklama obrazi va kampaniyaning siyosiy jihatdan sezgir kontekstga to‘g‘ri kelib qolgani bilan bog‘liq bo‘ldi.

Muallif: Hasanboy OCHUN