Хитой экспорти 2026 йилда 36,3 фоизга ошди

Хитой экспорти 2026 йил сентябрида ўтган йилнинг мос даврига нисбатан 36,3 фоизга ошди. Импорт ўсиш суръатлари ҳам юқори — йиллик ҳисобда 31 фоиз.

Экспортнинг ўсиши мамлакатнинг ташқи савдо профицитини кенгайтирган. Августда бу кўрсаткич 119,1 миллиард долларни ташкил этган бўлса, сентябрда 133,5 миллиардга етган.

Профицит — маълум бир даврда кирим (даромад) суммасининг чиқим (харажат) суммасидан ортиқ бўлиши, яъни ортиқча маблағ қолиши.

Экспорт ўсишининг асосий омилларидан бири юқори технологияли маҳсулотларга бўлган талабдир. Мамлакат ишлаб чиқариш салоҳияти ва кенг экспорт тармоғи орқали глобал бозорлардаги талабдан фойдаланмоқда. Айниқса, яримўтказгичлар ва автомобиллар савдо динамикасига катта ҳисса қўшмоқда.

Бироқ ташқи савдода ижобий рақамлар кузатилаётган бўлса-да, Хитой иқтисодиётининг барча йўналишларида вазият бир хил эмас. Мамлакатда ички истеъмол ва инвестициялар ҳамон суст. Бунга кўп йиллардан бери давом этаётган кўчмас мулк бозори инқирози ҳам таъсир кўрсатмоқда. 

Демак, экспортнинг жадал ўсиши ички бозордаги талаб ҳам кучайгани ёки аҳоли фаровонлиги ошаётганини англатмайди.

Хитойнинг ташқи савдодаги катта профицити унинг асосий савдо ҳамкорлари билан муносабатларига ҳам таъсир қилмоқда. Европа Иттифоқи ва АҚШ Хитой билан савдодаги номутаносибликни бартараф этиш масаласини кўтарди.

Чунки Хитой маҳсулотларининг халқаро бозорлардаги улуши ортиб бораётгани айрим мамлакатларда маҳаллий ишлаб чиқарувчилар рақобатбардошлигига салбий таъсир ўтказиши мумкин.

Хуллас, сентябрь ойидаги натижалар бир вақтнинг ўзида Хитойнинг кучли саноат ва экспорт салоҳиятини, ички талабни рағбатлантириш заруратини ҳамда савдо ҳамкорлари билан иқтисодий мувозанат масаласи тобора мураккаблашаётганини кўрсатади.