Банкомат пул бермаса, банклар жаримага тортилади

Бу ҳақда Марказий банк раиси Тимур Ишметов Сенат ялпи мажлисида маълум қилди.

290 мингга яқин носозлик қайд этилган

Сенат маълумотларига кўра, 2025 йил давомида банкоматлар орқали нақд пул ечиб олиш билан боғлиқ қарийб 290 мингта техник муаммо қайд этилган. Шу муносабат билан 3 мингдан ортиқ фуқаро ички ишлар органларига мурожаат қилган.

Сенатнинг Мудофаа ва хавфсизлик масалалари қўмитаси раиси Қутбиддин Бурхоновнинг таъкидлашича, ҳуқуқ-тартибот идоралари жиноятчиликнинг олдини олиш ўрнига, ана шундай техник муаммолар бўйича мурожаатларни ўрганишга вақт сарфлашга мажбур бўлмоқда.

Муаммоли операциялар улуши — 0,08 фоиз

Марказий банк раиси Тимур Ишметовнинг маълум қилишича, 2025 йил давомида банкоматлар орқали нақд пул бериш бўйича жами 341 миллионта операция амалга оширилган.

Шундан муаммоли операциялар улуши атиги 0,08 фоизни ташкил этган.

Носозликларнинг тахминан 85 фоизи банклар айби билан юзага келмаган. Жумладан:

• 20 фоиз ҳолатда банкоматда зарур номиналдаги купюралар тугаган;
• 20 фоизида банк картаси блокланган ёки PIN-код нотўғри киритилган;
• 15 фоизида алоқа тизимида узилишлар кузатилган;
• қарийб 10 фоизида электр таъминотидаги узилишлар сабаб бўлган.

Шу билан бирга, муаммоли операцияларнинг қарийб 15 фоизи, яъни 46 мингга яқин ҳолат бевосита банклар ва тўлов тизими операторлари айби билан содир бўлган.

Августдан янги қоидалар кучга киради

Тимур Ишметовнинг таъкидлашича, Марказий банк банк хизматлари сифатини ошириш ва истеъмолчилар ҳуқуқларини ҳимоя қилиш мақсадида янги меъёрий ҳужжатлар пакетини ишлаб чиққан.

Унинг биринчи қисми 2026 йил 6 августдан кучга киради. Шундан сўнг банкоматлар орқали хизмат кўрсатиш қоидаларини бузган банкларга нисбатан молиявий жарималар қўллаш механизми ишга туширилади.

Бундан ташқари, Марказий банк фуқаролар мурожаатлари билан ишлаш сифати бўйича махсус рейтинг жорий этади. Энг паст кўрсаткичга эга банклар рўйхати жамоатчиликка мунтазам эълон қилиб борилиши режалаштирилган.