Энг бахтли мамлакатлар ичида Ўзбекистон борми?

БМТ ҳисоботига кўра, Финландия энг бахтли мамлакатлар рейтингида кетма-кет саккиз йилдан буён пешқадамлик қилмоқда.

Ўзбекистон бахтлилик даражаси бўйича 53-ўринни эгаллади. Марказий Осиё давлатларида Қозоғистон 43-ўринда, Қирғизистон 75-ўринда, Тожикистон 90-ўринни қайд этган. Туркманистон эса негадир бу рўйхатга умуман киритилмаган.

Рейтинг 140 дан ортиқ мамлакат аҳолиси ўртасида ўтказилган Gallup World Poll сўрови асосида тузилади. Унда сўнгги уч йилдаги ҳаёт сифатига қараб давлатларнинг бахтлилик даражаси баҳоланади.

Таҳлил жараёнида олтита асосий кўрсаткич инобатга олинади: аҳоли жон бошига тўғри келадиган ялпи ички маҳсулот, ижтимоий қўллаб-қувватлаш, кутилаётган умр давомийлиги, эркинлик, саховат ва коррупцияни англаш даражаси.

Шимолий Европа давлатлари мазкур рейтингда етакчиликни давом эттирмоқда. Рўйхатда Финландиядан кейин ўринда Дания, Исландия ва Швеция жой олган. Норвегия бу йил рейтингда еттинчи ўринни эгаллади.

Лотин Америкасининг икки мамлакати — Коста-Рика ва Мексика биринчи марта энг бахтли мамлакатлар ўнталигига кирди. Шунингдек, кучли ўнликдан Нидерландия (бешинчи), Исроил (саккизинчи) ва Люксембург (тўққизинчи) жой олди.