Арманистонда йирик сунъий интеллект маркази ишга туширилди

Марказнинг очилиш маросимида Арманистон бош вазири Никол Пашинян, Қозоғистон бош вазирининг ўринбосари Жаслан Мадиев ва АҚШнинг Арманистондаги вақтинча ишлар вакили Дэвид Аллен иштирок этган.

AI Factory’лар сунъий интеллект моделларини ўқитиш, такомиллаштириш ва ишга тушириш учун зарур бўлган юқори қувватли ҳисоблаш инфратузилмасини таъминлайди.

Firebird маълумотларига кўра, компания Арманистонни сунъий интеллект тадқиқотлари, юқори унумли ҳисоблаш ва инновациялар марказларидан бирига айлантиришни мақсад қилган. Компаниянинг ҳозирги маълумотларида Арманистондаги биринчи AI Factory 6 144 та NVIDIA B200 GPU ва 15 МВт қувват билан ишлаши кўрсатилган.

Марказ маҳаллий стартаплар, компаниялар, университетлар, илмий-тадқиқот гуруҳлари ва давлат ташкилотларига сунъий интеллект моделларини ишлаб чиқиш ҳамда синовдан ўтказиш учун юқори қувватли ҳисоблаш ресурсларидан фойдаланиш имконини бериши кутилмоқда. Арманистон ҳукумати ҳам лойиҳани мамлакатнинг технологик салоҳиятини ошириш нуқтаи назаридан стратегик аҳамиятга эга ташаббус сифатида баҳолаган.

Firebird лойиҳани кейинги босқичларда янада кенгайтиришни режалаштирмоқда. Компания аввалроқ Арманистондаги лойиҳанинг иккинчи босқичи учун қўшимча NVIDIA GPU’ларини олиб келиш бўйича АҚШ экспорт лицензияларини олганини билдирган эди.

Шу тариқа, Арманистон Кавказда сунъий интеллект учун йирик ҳисоблаш инфратузилмаси яратилаётган давлатлардан бирига айланмоқда.