Ғазодаги энг йирик оммавий жаноза маросими бўлиб ўтди

Қуёш тиғида байроқларга ўралган замбилларда ётган 112 та чириган жасад қолдиқлари…

Булар – қарийб уч йил аввал Исроил томонидан қириб ташланган келиб чиқиши бадавийларга бориб тақаладиган Сабралик ал-Ҳассайнлар сулоласи аъзоларига тегишли жасадлар.

Фаластин расмийларининг маълумотларига кўра, 2023 йил 22 ноябрда Исроил ҳаво ҳужумлари Ғазо шаҳрининг эски маҳаллаларидан саналган Сабрада аҳоли уйқудалигида бир нечта кўп қаватли биноларни қулатган. Оқибатида ал-Ҳассайнлар сулоласининг 308 нафар аъзоси ҳалок бўлган.

Вафот этганларнинг деярли ярми аввалроқ топилиб, дафн этилган, бироқ шу пайтгача вайроналар остида 153 та жасад қолиб кетаётган эди.

Орадан қарийб уч йил ўтгач, 40 нафар ишчидан иборат қутқарув гуруҳи 17 кун давомида вайроналарни синчковлик билан кўздан кечириб, бедарак йўқолган 112 нафар қурбоннинг тана қолдиқларини олиб чиқди.

4-август куни қўшнилар ва уруғнинг омон қолган аъзоларидан иборат гуруҳ вайроналардан тозаланган текис майдонга йиғилди.

Бу ерда Фаластин ҳукумати Ғазо урушидаги энг йирик оммавий жаноза маросими деб таърифлаган тадбир учун жасадлар сафлаб қўйилган эди.

Эркаклар замбилларни кўтариб, кўчалар бўйлаб олиб ўтишди. Бир пешлавҳага марҳумлар — эркаклар, аёллар ва болаларнинг суратлари осилган.

Фаластин соғлиқни сақлаш идоралари маълумотларига кўра, Исроилнинг Ғазодаги урушида 73 мингдан ортиқ фаластинлик ҳалок бўлгани тасдиқланган. Аксарият ўлим ҳолатлари жасадлар ўликхоналарга келтирилиб, дафн этилганида қайд этилган. Яна 8000 га яқин одам вайроналар остида кетган, деб тахмин қилинади.

Бу уруш Исроил баёнотига кўра, 2023 йил ноябр ойида ҲАМАС бошчилигидаги жангарилар Ғазодан бостириб кириб, 1200 нафар исроилликни ўлдирганидан сўнг бошланган эди.