Исроил ҳужумлари туфайли Ғазода 18 киши ҳалок бўлди

Дональд Трамп ўтган йилги сулҳ битимини амалга оширишда ютуққа эришилганини айтганига қарамай, 2 август куни Исроил Ғазога кетма-кет иккинчи кун ҳаводан зарба берди. Тиббиёт ходимларининг сўзларига кўра, ҳужумлар оқибатида камида 18 нафар фаластинлик ҳалок бўлган.

Исроил ҳарбий самолётлари тонг саҳардан шимолдаги Ғазо шаҳрига, марказдаги Дайр ал-Балаҳ шаҳрига ва жанубдаги Хон Юнис ҳудудига зарбалар берган.

Трампнинг 30 июл куни Фаластиннинг ҲАМАС ҳаракати ва бошқа қуролли гуруҳлар қуролсизланишга рози бўлгани ҳақидаги баёноти можарони тугатишга бўлган умидларни кучайтирганди.

2 август куни Исроил энергетика вазири Эли Коэн ҳукумат ҲАМАСга қуролсизланиш имкониятини беришини, бироқ бунинг амалга ошишига «шубҳа билан» қарашини таъкидлади.

Коэн Ғазога ҳужумларни тўхтатиш бўйича ҳеч қандай келишув бўлмаганини айтди. Унинг таъкидлашича, агар ҲАМАС қуролсизланмаса, анклавнинг 70 фоизини назорат қилиб турган Исроил ҳудудни тўлиқ ўз назоратига олиши зарур.

«АҚШ билан имзолаган келишувимизда биз ҲАМАС тарқатиб юборилиши керак, деган позициядамиз. Бу биринчи навбатда амалга оширилиши керак бўлган иш», — дея қўшимча қилди у.

ҲАМАС эса Исроил Ғазога ҳужумларини тўхтатиб, қўшинларини олиб чиққанидан кейингина Ғазони бошқариш учун ташкил этиладиган янги Фаластин органига қуролларни топширишга рози бўлишини маълум қилди. Бу сулҳ битимининг асосий шартларидан бири ҳисобланади.