Шри-Ланка давлат тадбирларида бир марталик пластик идишлардан фойдаланишни тақиқлади

Пластик идишлардан ортиқча фойдаланишни чеклаш мақсадида Шри-Ланка ҳукумати 31 майдан бошлаб давлат муассасаларида бир марталик пластик сув идишларини тақиқлаб, улардан фойдаланишни камайтириш учун полиэтилен халталарга мажбурий тўлов жорий этди.

Экологларнинг таъкидлашича, Шри-Ланка йиллар давомида пластмассага оид бир неча тақиқларни жорий этса-да, ижронинг сустлиги, қайта ишлаш инфратузилмасининг заифлиги ва истеъмолчиларнинг бир марталик маҳсулотларга ўрганиб қолгани тақиқ ишлашига тўсқинлик қилмоқда.

Шри-Ланкада кескин ортиб бораётган катта муаммо пластмасса билан боғлиқ. 2024-йилги Пластмасса чиқиндилари бўйича миллий ҳисоботга кўра, оролда йилига тахминан 250 000 метрик тонна пластмасса чиқиндилари ҳосил бўлади.

Шри-Ланка ҳар йили қайта ишлайдиган пластмасса чиқинди миқдори атиги 27 000 метрик тонна (умумий миқдорнинг 11 фоизи).

Йиғилмай қоладиган 68 000 метрик тонна (27%) пластмасса чиқиндиси одатда ёқилади, кўмиб ташланади ёки ноқонуний равишда ташлаб юборилади.

Тахминан 101 000 метрик тонна (41%) пластмасса эса чиқиндиларни бошқариш тизимида, яъни йиғиш, ташиш, саралаш ва йўқ қилиш жараёнларида ҳисобланмай қолмоқда.

Осиё тараққиёт банки таҳлилларига кўра, Шри-Ланкадаги пластмасса чиқиндиларининг қарийб 70 фоизи бир марталик ишлатиладиган пластмассалар ҳиссасига тўғри келади. Булар асосан ҳар ой ишлатиладиган 20 миллион дона қатиқ идиши, 15 миллион дона озиқ-овқат ўрами, 20 миллион дона харид халтаси ва 1 миллион дона соус, мураббо ҳамда шампунь солинган пакетчадан иборат.