Tolibon hukumati davlat amaldorlariga smartfonlardan foydalanishni taqiqladi

Tolibon hukumati davlat xizmatchilariga butun mamlakat bo‘ylab smartfonlardan foydalanishni taqiqladi. Huquq faollari bu harakat axborot olish imkoniyatini yanada cheklashi mumkinligidan xavotir bildirishgan.

Reuters agentligi ko‘rgan sud qarorida aytilishicha, 16-iyundan boshlab harbiy va fuqarolik muassasalarining barcha mansabdor shaxslari, jumladan, sudyalar uchun smartfonlardan foydalanish taqiqlanadi.

Buyruqda qoidabuzarlarning mobil telefonlari majaqlanishi va qonun bo‘yicha jazolanishi qayd etilgan.

Hukumat xodimlarining so‘zlariga ko‘ra, cheklov rasmiy ishlarga allaqachon to‘sqinlik qilgan, kamida bir viloyat hokimligi taqiqni zudlik bilan joriy etishni boshlagan.

"Buning ta’siri shu qadar jiddiyki, ko‘plab ma’muriy jarayonlar deyarli to‘xtab qoldi, chunki avvallari aksariyat rasmiy ishlar mobil telefonlar, WhatsApp va elektron pochta orqali bajarilar edi", — dedi davlat xodimlaridan biri.

Panjshir viloyati hokimi bayonotida taqiq idoraning barcha bo‘linmalarida joriy etilishini ma’lum qildi.

Huquq himoyachilarining ta’kidlashicha, smartfonlar afg‘onlar uchun ta’lim olish, qonunbuzarliklarni hujjatlashtirish, shaxsiy muloqot qilish va senzurasiz ma’lumotlardan foydalanish imkonini beruvchi sanoqli vositalardan biri bo‘lib qolmoqda.

Bu buyruq “Tolibon”ning 2021-yil avgustda hokimiyatga qaytganidan so‘ng jamoat ustidan nazoratni kuchaytirish yo‘lidagi navbatdagi qadami.

O‘shandan buyon Tolibon ayollar va qizlarga, OAVga va fuqarolik jamiyatiga nisbatan keng qamrovli cheklovlar joriy qildi.

Qizlarning o‘rta maktablar va universitetlarda o‘qishi taqiqlangan, ko‘plab ayollar ishdan chetlatilgan, faollar va jurnalistlar esa qo‘rqitish, hibsga olish hamda senzura holatlari haqida xabar bergan.