Жанубий кореяликлар тунни бедор ўтказди: Мамлакат сиёсатида нималар ўзгармоқда? (фото)

Кеча, 3 декабрь куни Жанубий Корея Президенти Юн Сок Ёль YNT телеканали орқали тўғридан-тўғри эфирга узатилган мурожаатда мамлакатда ҳарбий ҳолат жорий этилганини эълон қилди. Давлат раҳбари мазкур ҳаракат орқали Шимолий Кореяга хайрихоҳ кучларнинг йўқ қилишини ҳамда давлат бошқарувини конституциявий тартибда сақланиб қолишини таъкидлаган. 

"Yonhap" ҳамда "Reuters" нашрининг ёзишича, Жанубий Корея парламентида катта кучга эга бўлган мухолифатчи Демократик партия ҳукуматнинг бюджет бўйича таклифини рад этиб, давлат аудитори ва бош прокурорга импичмент эълон қилишга қарор қилган. Шу сабабли Президент Юн Сок Ёлнинг мамлакатда ҳарбий ҳолат жорий қилган.

Мамлакатда ҳарбий ҳолат жорий этилганидан кейин Президент парламент аъзолари билан йиғилиш ўтказиб, ўзига қарши импичмент процедураси (айрим мансабдор шахсларнинг мансабдан четлатиш ва жавобгарликка тортиш жараёни)ни ўтказишга уринишлар туфайли ҳокимият фалаж бўлиши хавфи борлигини айтган. 

Шунингдек, Жанубий Корея раҳбари (2022 йилда "Халқ кучи" партиясидан сайланган) парламентни назорат қилувчи Демократик партиядан бўлган мухолифларни Шимолий Кореяга хайрихоҳликда ва ҳукумат ишини фалаж қилаётган давлатга қарши фаолиятда айблаган.  

"Халқимизнинг озодлиги, бахт-саодати ҳамда конституциявий тартибга тажовуз қилувчи давлатга, яъни Шимолий Корея кучларини зудлик билан йўқ қилиш учун ҳарбий ҳолат эълон қиламан", деган Президент мурожаатда.

Президент ўз мурожаатида июнь ойида ҳукумат инаугурациясидан бери Миллий aссамблея 22 нафар давлат хизматчиси, хусусан, Ички ишлар вазири ва Мудофаа вазирига импичмент билан таҳдид қилганига ҳам тўхталган.  

Шунингдек, у мухолифатчи партияни гиёҳванд моддалар савдосига қарши кураш масаласидан тортиб, жамоат хавфсизлигини қўллаб-қувватлаш ҳамда болалар нафақаларигача бўлган энг муҳим харажатлар учун бюджетни қисқартиришда айблаган.

"Миллий мажлисимиз жиноий гуруҳлар маконига айланди. Қонунчилик диктатураси орқали мамлакат суд-маъмурий тизимини фалаж қилишга ва либерал демократия тизимини ағдариб ташлашга уринмоқда", дея қўшимча қилган у.

Аммо Юн Сок Ёль ҳарбий ҳолат доирасида қандай чоралар кўрилишига аниқлик киритмаган.

"Бу нафақат дунёнинг ҳар қандай мамлакати учун, балки мамлакатимиз ташкил этилганидан бери мисли кўрилмаган ҳодиса", дея Президент ўз нутқини якунлаган.

Ҳарбий ҳолат жорий этилгандан сўнг иш бошлаган ҳарбий қўмондонлик мамлакатда ҳар қандай сиёсий фаолият, жумладан, норозилик намойишлари ва сиёсий партиялар фаолияти тўхтатилганини эълон қилди. Шунингдек, барча ОАВ ва нашриётлар устидан назорат ўрнатди. 

"Yonhap" нашрига кўра, парламент биносига кириш полиция ва ҳарбийлар томонидан тўсиб қўйилган. Демократик партия етакчиси Ли Жэмён ҳарбий ҳолат жорий этилишини конституцияга зид деб атаган.

Президентнинг "Халқ кучи" партияси раҳбари Хaн Дон Хун эса буни нотўғри деб, Президент қарорини блоклашни ваъда қилган. Сўнг Ли Жэмён ҳам тарафдорларини Миллий ассамблея биносига келишга чақирган.

300 депутатдан 190 нафари хавфсизлик кучлари томонидан ўраб олинган Сеулдаги Миллий ассамблея биносига киришга муваффақ бўлган ҳамда ҳарбий ҳолатни бекор қилишни ёқлаб овоз берган. Сўнг Президент Юн Сок Ёль ҳам ўзи жорий этган ҳарбий ҳолат бекор қилинишини маълум қилган. 

Жанубий Кореяда юз бераётган ҳолатлар сабаб Ўзбекистоннинг Жанубий Кореяда бўлиб турган фуқаролари ҳам элчихона томонидан огоҳликка чақирилди.

"Хабарингиз бор, 3 декабрь куни Жанубий Кореяда ҳарбий ҳолат эълон қилинди. Бугунги кунда мамлакатда юзага келаётган ички сиёсий вазиятдан келиб чиққан ҳолда, барчангиздан Жанубий Кореяда турли хил митинглар ва намойишларда иштирок этмасликка, одамлар гавжум жойларга бормасликка, ўзингизнинг шахсий хавфсизлигингиз ва соғлигингизни эҳтиёт қилишга чақириб қоламиз", дея ёзади Ўзбекистоннинг Корея Республикасидаги элчихонаси.