Janubiy koreyaliklar tunni bedor oʻtkazdi: Mamlakat siyosatida nimalar oʻzgarmoqda? (foto)

Kecha, 3 dekabr kuni Janubiy Koreya Prezidenti Yun Sok Yol  YNT telekanali orqali toʻgʻridan-toʻgʻri efirga uzatilgan murojaatda mamlakatda harbiy holat joriy etilganini eʼlon qildi. Davlat rahbari mazkur harakat orqali Shimoliy Koreyaga xayrixoh kuchlarning yoʻq qilishini hamda davlat boshqaruvini konstitutsiyaviy tartibda saqlanib qolishini taʼkidlagan. 

"Yonhap" hamda "Reuters" nashrining yozishicha, Janubiy Koreya parlamentida katta kuchga ega boʻlgan muxolifatchi Demokratik partiya hukumatning byudjet boʻyicha taklifini rad etib, davlat auditori va bosh prokurorga impichment eʼlon qilishga qaror qilgan. Shu sababli Prezident Yun Sok Yolning mamlakatda harbiy holat joriy qilgan.

Mamlakatda harbiy holat joriy etilganidan keyin Prezident parlament aʼzolari bilan yigʻilish oʻtkazib, oʻziga qarshi impichment protsedurasi (ayrim mansabdor shaxslarning mansabdan chetlatish va javobgarlikka tortish jarayoni)ni oʻtkazishga urinishlar tufayli hokimiyat falaj boʻlishi xavfi borligini aytgan. 

Shuningdek, Janubiy Koreya rahbari (2022 yilda "Xalq kuchi" partiyasidan saylangan) parlamentni nazorat qiluvchi Demokratik partiyadan boʻlgan muxoliflarni Shimoliy Koreyaga xayrixohlikda va hukumat ishini falaj qilayotgan davlatga qarshi faoliyatda ayblagan.  

"Xalqimizning ozodligi, baxt-saodati hamda konstitutsiyaviy tartibga tajovuz qiluvchi davlatga, yaʼni Shimoliy Koreya kuchlarini zudlik bilan yoʻq qilish uchun harbiy holat eʼlon qilaman", degan Prezident murojaatda.

Prezident oʻz murojaatida iyun oyida hukumat inauguratsiyasidan beri Milliy assambleya 22 nafar davlat xizmatchisi, xususan, Ichki ishlar vaziri va Mudofaa vaziriga impichment bilan tahdid qilganiga ham toʻxtalgan.  

Shuningdek, u muxolifatchi partiyani giyohvand moddalar savdosiga qarshi kurash masalasidan tortib, jamoat xavfsizligini qoʻllab-quvvatlash hamda bolalar nafaqalarigacha boʻlgan eng muhim xarajatlar uchun byudjetni qisqartirishda ayblagan.

"Milliy majlisimiz jinoiy guruhlar makoniga aylandi. Qonunchilik diktaturasi orqali mamlakat sud-maʼmuriy tizimini falaj qilishga va liberal demokratiya tizimini agʻdarib tashlashga urinmoqda", deya qoʻshimcha qilgan u.

Ammo Yun Sok Yol harbiy holat doirasida qanday choralar koʻrilishiga aniqlik kiritmagan.

"Bu nafaqat dunyoning har qanday mamlakati uchun, balki mamlakatimiz tashkil etilganidan beri misli koʻrilmagan hodisa", deya Prezident oʻz nutqini yakunlagan.

Harbiy holat joriy etilgandan soʻng ish boshlagan harbiy qoʻmondonlik mamlakatda har qanday siyosiy faoliyat, jumladan, norozilik namoyishlari va siyosiy partiyalar faoliyati toʻxtatilganini eʼlon qildi. Shuningdek, barcha OAV va nashriyotlar ustidan nazorat oʻrnatdi. 

"Yonhap" nashriga koʻra, parlament binosiga kirish politsiya va harbiylar tomonidan toʻsib qoʻyilgan. Demokratik partiya yetakchisi Li Jemyon harbiy holat joriy etilishini konstitutsiyaga zid deb atagan.

Prezidentning "Xalq kuchi" partiyasi rahbari Xan Don Xun esa buni notoʻgʻri deb, Prezident qarorini bloklashni vaʼda qilgan. Soʻng Li Jemyon ham tarafdorlarini Milliy assambleya binosiga kelishga chaqirgan.

300 deputatdan 190 nafari xavfsizlik kuchlari tomonidan oʻrab olingan Seuldagi Milliy assambleya binosiga kirishga muvaffaq boʻlgan hamda harbiy holatni bekor qilishni yoqlab ovoz bergan. Soʻng Prezident Yun Sok Yol ham oʻzi joriy etgan harbiy holat bekor qilinishini maʼlum qilgan. 

Janubiy Koreyada yuz berayotgan holatlar sabab Oʻzbekistonning Janubiy Koreyada boʻlib turgan  fuqarolari ham elchixona tomonidan ogohlikka chaqirildi.

"Xabaringiz bor, 3 dekabr kuni Janubiy Koreyada harbiy holat eʼlon qilindi. Bugungi kunda mamlakatda yuzaga kelayotgan ichki siyosiy vaziyatdan kelib chiqqan holda, barchangizdan Janubiy Koreyada turli xil mitinglar va namoyishlarda ishtirok etmaslikka, odamlar gavjum joylarga bormaslikka, oʻzingizning shaxsiy xavfsizligingiz va sogʻligingizni ehtiyot qilishga chaqirib qolamiz", deya yozadi Oʻzbekistonning Koreya Respublikasidagi elchixonasi.