АҚШ 2026 йилги Жаҳон чемпионати хавфсизлиги учун қанча маблағ ажратади?

Бу ҳақда мамлакатнинг мундиалга тайёргарлик бўйича ишчи гуруҳи раҳбари Эндрю Жулиани маълум қилди.

Жулианининг айтишича, Ички хавфсизлик вазири Кристи Ноем ҳамда Оқ уй ишчи гуруҳи турнир хавфсизлиги энг устувор масалалардан бири эканини қайд этиб, ажратилаётган маблағ миқдори бўйича бу “энг йирик пакетлардан бири” ҳисобланади.

Ажратиладиган маблағ таркиби қуйидагича:

• 625 миллион доллар — ҳуқуқни муҳофаза қилиш органларини қўллаб-қувватлаш, киберхавфсизлик бўйича тренинглар, фавқулодда вазиятларга тайёргарлик ишлари учун;
• 500 миллион доллар — дронларга қарши кураш дастурини кенгайтириш учун.

Маълумот учун, 2026 йилги Жаҳон чемпионати 11 июн – 19 июл кунлари АҚШ, Канада ва Мексика мезбонлигида ўтказилади. Турнирда тарихда илк бор 48 та терма жамоа иштирок этади.

Мундиалга қуръа ташлаш маросими 5 декабр куни, АҚШ пойтахти Вашингтондаги “The Kennedy Center” мажмуасида бўлиб ўтади.