Суд Абдурахмон Ташановга нисбатан қўзғатилган маъмурий ишни рад этди

Бу ҳақда Ташанов фейсбук саҳифасида маълум қилди.

Унинг айтишича, суд ишни кўриб чиқиш учун асос бўлган материалларда жабрланувчи ёки аризачи мавжуд эмаслиги сабабли ишни кўришни рад этган.

Ташановнинг таъкидлашича, маъмурий иш материаллари махфийлаштирилгани ва суд жараёни ёпиқ тарзда ўтгани боис иш тафсилотларини тўлиқ очиқлаш имкони йўқ. Шу билан бирга, агар иш материаллари қайта тақдим этилса, айблов асоссиз экани янада ойдинлашишини билдирган.

У суд қарорини адолатнинг қарор топиши сифатида баҳолаб, Миробод тумани судига миннатдорлик билдирган.

Аввалроқ, Ташановга нисбатан Маъмурий жавобгарлик тўғрисидаги кодекснинг 202(2)-моддаси 1-қисми (ёлғон хабар тарқатиш) асосида иш қўзғатилгани хабар қилинган эди.

Ташановнинг маълум қилишича, мазкур иш унинг Facebook саҳифасида ёзган постлари ва оммавий ахборот воситаларига берган интервьюлари билан боғлиқ бўлган. У ўз чиқишларида фуқароларнинг инсон ҳуқуқлари билан боғлиқ мурожаатлари ҳамда расмий ҳужжатларга асосланган маълумотларни ёритганини таъкидлаган.