Гарчи асосий талафот можародан бевосита жабр кўрган ва импорт қилинадиган энергияга қарам бўлган мамлакатларга тўғри келса-да, тадқиқот натижалари жанговар ҳаракатлардан йироқда жойлашган камбағал давлатларга ҳам жиддий ва узоқ муддатли зарар етишини кўрсатмоқда.
Вақтинчалик сулҳга қарамай, можаронинг таъсири “кескин” босқичдан “давомли” босқичга ўтмоқда. Бу босқич қанча узоқ давом этса, камбағал мамлакатларнинг қашшоқликка юз тутиши хавфи шунчалик ортади. Энг ёмон сценарийда эса яна 32 миллион киши қашшоқлик домига тушиши мумкин.
Ҳисоботда таъкидланишича, айниқса, Форс кўрфази, Осиё, Саҳрои Кабирдан жанубдаги Африка давлатлари ҳамда ривожланаётган кичик орол-давлатлар заиф ҳисобланади.
“Уруш – бу тараққиётнинг акси. Зиддият мамлакатларнинг йиллар давомида бунёд этганини бир неча ҳафта ичида йўққа чиқариши мумкин. Янги таҳлил Яқин Шарқдаги можаро кескинлашувининг зиёни бевосита жабр кўрган мамлакатлар билан чекланиб қолмай, балки энергия ва озиқ-овқат нархларининг кўтарилишига мослашиш учун молиявий имкониятлари чекланган давлатларга ҳам қимматга тушаётганини кўрсатмоқда. Улар бугунги нархларни барқарорлаштириш ҳамда келажакдаги соғлиқни сақлаш, таълим ва иш ўринларини молиялаштириш ўртасида имконсиз танлов қилишга мажбур бўлишади. Бунинг олдини олишда ўз вақтида кўрилган сиёсий чоралар аҳамиятли.” – деди БМТТД маъмури ва БМТ Бош котибининг ўринбосари Александр Де Кроо.
БМТТД ҳар бир эҳтимолий сценарий учун можаро оқибатларини юмшатишга қаратилган аниқ сиёсий чораларни таклиф қилмоқда.
Асосий тавсия – камбағал ва ижтимоий ҳимояга муҳтож қатламларни қўллаб-қувватлаш учун мақсадли ва вақтинчалик пул ёрдамларини жорий этиш.
Ҳисоб-китобларга кўра, вазиятга қараб, бу чорани самарали амалга ошириш учун 6 миллиард долларгача маблағ зарур бўлади.
