Молдова МДҲ аъзолигини тугатиш сари қадам қўйди

Бу ҳақда ташқи ишлар вазири Михай Попшой маълум қилди.

Вазирнинг таъкидлашича, айни пайтда МДҲни ташкил этувчи асосий ҳужжатларни бекор қилиш (денонсация қилиш) устида ишлар олиб борилмоқда. Хусусан, 1993 йил 22 январда Минск шаҳрида имзоланган МДҲ Низоми, 1991 йил 8 декабрдаги МДҲни ташкил этиш тўғрисидаги битим ҳамда 1991 йил 22 декабрда қабул қилинган унга илова ҳақида сўз бормоқда.

«Ушбу учта асосий шартнома бекор қилингач, Молдова Республикаси расман МДҲ таркибидан чиқади. Бу жараён аллақачон бошланган. Қарор яқинда қабул қилинди, ҳозир эса тасдиқлаш босқичи давом этмоқда», — деди Попшой.

Унинг сўзларига кўра, парламентнинг янги сессияси бошланганидан сўнг денонсацияга оид ҳужжатлар қонун чиқарувчилар томонидан кўриб чиқилади.

«Февраль ойининг ўрталарига қадар, эҳтимол, ҳукумат даражасидаги барча жараёнлар якунланади. Шундан сўнг парламент ушбу қарорни қабул қилади», — деди вазир.

Попшой таъкидлаганидек, агар қонун чиқарувчи орган учта таъсис шартномасини бекор қилишни маъқулласа ва президент барча техник босқичлар якунланганидан сўнг уларни тасдиқласа, Молдова МДҲ аъзолигини тўлиқ тугатади.

Маълумот учун, Молдова ҳозиргача МДҲ доирасида жами 283 та келишув имзолаган. Уларнинг 71 таси аллақачон бекор қилинган, тахминан 60 таси эса бекор қилиш жараёнида. Кишинёв расмийлари Россиянинг Украинага бостириб киришидан сўнг, 2022 йил февраль ойида МДҲ билан тузилган келишувларни бекор қилиш жараёнини бошлаган эди.