Бундан буён “камбағал оила қолмади” деган ҳисобот ўтмайди – Президент

Президент Шавкат Мирзиёев Бухоро вилоятига ташрифи доирасида ҳудуд иқтисодиётини ривожлантириш ва аҳоли турмуш даражасини ошириш масалаларига бағишланган йиғилиш ўтказди.

Йиғилишда келтирилган маълумотларга кўра, Бухоро вилоятидан 99 минг нафар фуқаро меҳнат миграциясида. Хориждан қайтган 24 минг киши эса ҳали иш топмаган. Вилоятда ишсизлар сони 40 мингга яқин, яна 270 минг нафар аҳолининг даромади ўртача кўрсаткичдан паст.

Шу муносабат билан давлат раҳбари камбағалликни қисқартириш бўйича расмий ҳисоботларга юзаки ёндашувга йўл қўйилмаслигини таъкидлади.

«Бундан буён “камбағал оила қолмади” деган ҳисобот ўтмайди», – деди Шавкат Мирзиёев.

Масъулларга хорижда кам иш ҳақига ишлаётган юртдошларни касбга ўқитиш ва юқори даромадли иш ўринларига жойлаштириш вазифаси топширилди.

Шунингдек, даромади ўртача кўрсаткичдан паст бўлган 270 минг нафар аҳолининг даромадини ўртача ва ундан юқори даражага олиб чиқиш бўйича туманлар кесимида аниқ режалар ишлаб чиқиш белгиланди.