“Uzbekistan Airways” Карачига тўғридан-тўғри парвозларни йўлга қўяди

Тадбирнинг мақсади Ўзбекистоннинг сайёҳлик имкониятларини Покистон жамоатчилиги орасида кенг тарғиб этиш ва мамлакатимизга хорижий сайёҳлар оқимини оширишдир.

Анжуманда “BMG Group” компанияси раиси Муҳаммад Зубаир Мотивала, Покистон сайёҳлик агентликлари уюшмаси раисининг ўринбосари Муҳаммад Иляс, “Ўзбекистон–МДҲ савдо маркази” раҳбари Суҳаил Мотен, Синд Туризм корпорацияси вакиллари, туризм операторлари, маҳаллий ОАВ ва ватандошлар иштирок этди.

Элчихона вакили ўз нутқида икки халқни боғлаб турган умумий тарихий ва маданий ришталар, ўхшаш урф-одатлар ва қадриятлар ҳақида сўз юритди. Шунингдек, Ўзбекистонда зиёрат, маданий, тиббий, экологик ва ишбилармонлик туризмини ривожлантириш йўналишида амалга оширилаётган ислоҳотлар ва қулай шарт-шароитлар ҳақида маълумот берди.

Қатнашчиларга жорий йилнинг 30 октябридан 13 ноябригача Самарқандда ЮНЕСКО Бош конференциясининг 43-сессияси ўтказилиши ҳақида ҳам маълум қилинди. Бу, ўз навбатида, Ўзбекистоннинг халқаро нуфузи ортиб бораётганидан далолат сифатида қайд этилди.

Шунингдек, “Uzbekistan Airways” компанияси ҳозирда Исломобод ва Лаҳор шаҳарларига мунтазам рейслар амалга ошираётгани, яқин вақтда Карачига тўғридан-тўғри парвозлар йўлга қўйилиши маълум қилинди

Муҳаммад Мотивала Ўзбекистондаги туризм соҳасидаги ислоҳотларни юқори баҳолаб, мамлакатнинг барқарор иқтисодий муҳити ва инфратузилмаси покистонлик инвесторлар учун катта имкониятлар очаётганини таъкидлади. У Карачи ва Ўзбекистон ўртасида тўғридан-тўғри авиақатновларни йўлга қўйиш зарурлигини ҳам қайд этди.

Покистон сайёҳлик уюшмаси вакили Муҳаммад Иляс Ўзбекистоннинг зиёрат ва ислом цивилизацияси туризми соҳасидаги улкан салоҳиятини эътироф этиб, икки мамлакат ўртасида махсус зиёрат ва маданий саёҳат дастурларини ишлаб чиқиш бўйича ҳамкорликка тайёрлигини билдирди.

Суҳаил Мотен Ўзбекистон ва Покистонни боғлаб турган Ипак йўли тарихи ҳақида сўзлаб, туризмни икки халқ ўртасидаги дўстлик ва ишончни мустаҳкамловчи муҳим восита сифатида таъкидлади.

Тадбир доирасида Ўзбекистоннинг бой тарихий ва маданий мероси, туристик манзилгоҳлари ҳамда замонавий инфратузилмаси ҳақида тақдимотлар ва видеороликлар намойиш этилди.