Қирғизистон Россия ТИВга нота юборди

Қирғизистоннинг Россиядаги элчихонаси Россия Федерацияси Ташқи ишлар вазирлигига қирғизистонлик Элистан Токтогуловни ватанига тезроқ қайтаришни сўраб нота юборди.

Бунга номаълум шахсларнинг фирибгарлик ҳаракатлари оқибатида Россия ҳудудидаги ҳарбий қисмлардан бирига тушиб қолган Қирғизистон Республикаси фуқароси ҳақидаги хабарлар сабаб бўлди.

Шунингдек, элчихона Россиянинг ваколатли органларига воқеа тафсилотларини текшириш, айбдорларни аниқлаш ва уларни қонунга мувофиқ жавобгарликка тортиш сўрови билан мурожаат қилган.

Дипломатлар Элистан Токтогуловнинг яқинлари билан доимий алоқада бўлиб турибди. Идоранинг таъкидлашича, вазият назорат остида, зарур ёрдам кўрсатиш ишлари давом этмоқда.

ТИВ фуқароларни контракт ва бошқа шартномаларни имзолашдан олдин диққат билан ўрганиб чиқишга, бунда мажбуриятлар ҳамда ҳуқуқий оқибатларга алоҳида эътибор қаратишга чақирди. Идора хориждаги қирғизистонликларнинг ҳуқуқлари ва қонуний манфаатларини ҳимоя қилишга кўмаклашишда давом этишини таъкидлади.

Сохта иш таклифи ва тузоқ

4 ноябрь куни Манасда 21 ёшли Элистан Токтогуловнинг қариндошлари уни уйига қайтаришда ёрдам сўраб ҳукуматга мурожаат қилган. Унинг акаси Баястан Куштарбек уулунинг сўзларига кўра, йигит Instagram орқали Россияда иш таклифини топган. Унга 105 мингдан 110 минг рублгача маош билан юк ташувчи, қоровул ёки автомеханик сифатида ишга жойлаштиришни ваъда қилишган.

Россияга борганидан сўнг эса бари ёлғон бўлиб чиққан. Яқинларининг айтишича, ҳозирда уни таҳдид остида Украинадаги урушга боришга мажбурлашмоқда.

Аввалроқ Россия армиясига 20 мингдан ортиқ марказий осиёлик ёллангани ҳақида мақола эълон қилгандик.