Қозоғистонда 30 мингдан ортиқ оила тошқиндан кейин бир марталик нафақа олди

Қозоғистон бош вазири ўринбосари Канат Бозумбаев сешанба куни бўлиб ўтган ҳукумат йиғилишида 15 мингдан ортиқ уй ва қишлоқ уйлари кўрикдан ўтказилганини маълум қилди. Жами 9 мингдан ортиқ уй реставрация қилиниши керак, 4315 таси авария ҳолатида деб топилган.

Ҳудудларда 1847 та уй ва хонадонлар қурилиши бошланди, иккиламчи бозорда 3417 та уй-жой сотиб олиш режалаштирилган. Қисқа қурилиш мавсуми ҳисобга олиниб, ўқув йили бошига қадар жабрланган қозоғистонликларга уй ва хонадонлар топширилиши режалаштирилган.

Қозоғистон Фавқулодда вазиятлар вазирлиги маълумотларига кўра, 63 минг эвакуация қилинганлар аллақачон уйларига қайтган, 5,3 минг киши эса вақтинчалик жойлаштириш марказларида қолмоқда. Сув тошқини олдини олиш ишларига 4,4 минг киши ва 665 техника, 260 насос, 54 та кема ва тўртта самолёт жалб этилган.

Эслатиб ўтамиз, апрель ойининг бошида Президент Қосим-Жомарт Тоқаев қозоғистонликларга мурожаат қилиб, ҳеч бир фуқаро давлат эътиборидан четда қолмаслиги, барчага моддий ва бошқа зарур ёрдам кўрсатилиши, барча моддий йўқотишлар қоплаб берилишини маълум қилган эди.