ChatGPT етти ёшли боладаги инсульт аломатларини шифокорлардан олдин аниқлади

Буюк Британияда етти ёшли бола танасининг чап қисмида увишиш ва ҳолсизликдан шикоят қилганидан бир неча ҳафта ўтиб инсультни бошдан кечирган. Унинг онаси дастлаб ChatGPT'га мурожаат қилган ва сунъий интеллект боладаги аломатлар инсульт белгиси бўлиши мумкинлигини тахмин қилган, бироқ дастлабки шифохона кўригида боланинг ҳолати аниқланмаган.

Воқеа 2026 йил май ойида бошланган. Етти ёшли Жуниор сузиш вақтида танасининг чап қисмида увишиш, "жимирлаш" ва ҳолсизликни ҳис қилган.

Боланинг онаси Эванжелин Уильямс унинг аломатлари сабабини аниқлаш учун ChatGPT'дан маслаҳат сўраган. Сунъий интеллект бу белгилар инсульт билан боғлиқ бўлиши мумкинлигини айтиб, болани шифокорга кўрсатишни тавсия қилган.

Шундан сўнг она болани шифохонага олиб борган. Бироқ шифокорлар кўрикдан кейин болани уйига жўнатган.

Кейинги ҳафталарда боланинг аҳволи ёмонлашишда давом этган. 25 июн куни Жуниор кўнгли айниб уйғонган, алаҳсирай бошлаган, атрофдагиларга жавоб бермаган ва деярли ҳаракатлана олмаган.

Онаси уни яна шифохонага олиб борган.

«У уйғониб, ўзини ёмон ҳис қилаётганини айтди, кейин бир неча марта қайт қилди. У жуда қаттиқ гангиб қолган эди. Куларди, юра олмасди ва ўз танасининг оғирлигини ушлаб туролмасди. У умуман жавоб бермасди», — дея айтган боланинг онаси.

Ўша куни Буюк Британияда ҳаво ҳарорати 38 даражагача кўтарилган эди. Шу сабабли она дастлаб боланинг аҳволи кучли иссиқ туфайли ёмонлашган бўлиши мумкин деб ўйлаган.

Бироқ шифохонада боланинг аҳволи янада жиддий экани маълум бўлган. Онасининг айтишича, унда тутқаноққа ўхшаш аломатлар пайдо бўлган ва бола оғриқдан қичқирган. Оиланинг қатъий талабидан сўнг шифокорлар болани тўлиқ текширган.

Ўтказилган томография натижасида мия артерияларидан бири тиқилиб қолгани аниқланган. Бу эса ишемик инсультга сабаб бўлган.

Жуниор шошилинч равишда ихтисослашган клиникага олиб кетилган ва уч ҳафта давомида сунъий кома ҳолатида сақланган. Шифокорлар боланинг тикланишига пессимистик прогноз берган — энг яхши ҳолатда у ўнг қўли билан тугмасини тақа олиш даражасида тикланиши мумкинлигини айтишган.

Аммо боланинг аҳволи кутилганидан яхшироқ кечган. 11 август куни у шифохонадан чиқарилган. Ҳозир Жуниор яна юриш ва апиришни ўрганмоқда.

Шунга қарамай, инсульт натижасида миясининг зарарланиши унинг ривожланишида жиддий ортга кетишга сабаб бўлган. Айни пайтда онаси унинг реабилитацияси билан шуғулланмоқда.

Мазкур ҳолат юзасидан шифохоналар бирлашмаси вакили боланинг оиласидан расман узр сўраган. Шунингдек, шифокорлар нима сабабдан инсультни дастлабки босқичда аниқлай олмаганини ўрганиш учун ички текшируv бошланган.